«Երեկ, երբ Վեհափառի դեմ դուրս եկած հոգեւորականները փորձում էին մոտենալ Վեհարանին, բայց մարդիկ թույլ չէին տալիս, որ առաջ գնան, իրենք շրջափակված էին ագրեսիվ, արնախումի տպավորություն թողնող անձանցով: Վերջիններս այդ ժամանակ սկսեցին մեզ ոտքերով հարվածել, չէին թողնում, որ մոտենանք ու եպիսկոպոսներին հարցեր տանք: Չգիտեմ՝ որքանով է հավաստի, ասում են, որ ԱԱԾ-ից էին: Ընդ որում, երբ այդ մարդիկ տեսան, որ լրագրողներն իրենց նկարում են, սկսեցին իրենց դեմքերը փակել, թաքցնել»,-Aravot.am-ի հետ զրույցում նշեց Yerevan Today-ի լրագրող Անի Ներկարարյանը, որի ինքնազգացողությունը վատացել էր Մայր Աթոռում կատարվող իրադարձությունները լուսաբանելիս:
«Վերջում այդ եպիսկոպոսները արեցին իրենց հայտարարությունը, որն այդպես էլ չլսվեց, իսկ քաղաքացիները նրանց հետեւից գիտեք, թե ինչ էին վանկարկում: Այդ ընթացքում, երբ նրանք շարժվում էին դեպի մեքենան, որպեսզի հեռանան, մեզ նորից սկսեցին հրել, ինձ եւս հրեցին, ես մի քանի անգամ ընկա՝ կորցնելով հավասարակշռությունս: Գլխիս հարվածեցին, թեւերիս, ոտքերիս…Ինձ համար սպասելի էր, որ այդպես կլինի, սակայն չէի սպասում, որ այդ մարդիկ չեն խնայի լրագրողներին, անգամ կանանց…Այդ ամենի արդյունքում ինձ մոտ ճնշման տատանում եղավ ու իմ ինքնազգացողությունը վատացավ »,-նշեց Անին:
Նա հավելեց, որ տիրադավ հոգեւորականներին թիկնապահող եւ լրագրողներին հարվածող անձինք քաղաքացիական հագուստով էին. «Նրանք արդեն իսկ ագրեսիվ տրամադրված եկել էին, որեւէ մեկին չէին խնայում, հարվածում էին լրագրողներին, օպերատորներին, մեր տեխնիկային, տեսախցիկներին, միկրոֆոններին»:
Ի դեպ, Վեհափառ Հայրապետի դեմ դուրս եկած հոգեւորականներին ուղեկցողներից մեկը Վաղարշապատ համայնքի ղեկավարի «Հանրապետություն» կուսակցության թեկնածու Հարություն Մկրտչյանն էր:
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: