Բութանի իշխանությունները հայտարարել են, որ պետական ռեզերվից մինչև 10 000 բիթքոյն կուղղեն երկրի հարավում նոր տնտեսական կենտրոնի՝ Gelephu Mindfulness City («Գելեպհու գիտակցվածության քաղաք») ստեղծմանն ու զարգացմանը։ Նախագիծը միտված է կայուն զարգացմանն ու ներդրումների ներգրավմանը՝ ներառյալ թվային ակտիվների կիրառումը։
Կառավարության ներկայացուցիչների խոսքով՝ բիթքոյնը դիտարկվում է որպես ռազմավարական պահուստային ակտիվ։ Այն կարող է օգտագործվել գանձապետական գործարքների ապահովման համար, որպես գրավ կամ արժեքի երկարաժամկետ պահպանման գործիք։ Միջոցների բաշխման կոնկրետ մեխանիզմները կսահմանվեն առաջիկա ամիսներին։
Բութանը արդեն մի քանի տարի զբաղվում է բիթքոյնի մայնինգով՝ օգտագործելով հիդրոէներգիայի ավելցուկը։ 2025 թվականի կեսերին բիթքոյնը կազմել է Հիմալայան թագավորության ՀՆԱ-ի շուրջ 40%-ը։ Gelephu-ն կդառնա երկրի ավելի լայն թվային ռազմավարության մաս, որը ներառում է ազգային թվային նույնականացման համակարգ, կրիպտո վճարումներ զբոսաշրջության ոլորտում և սեփական ոսկով ապահովված TER թվային տոկենի գործարկում։
Թագավորության բիթքոյնները պահվում են պետական Druk Holding & Investments հիմնադրամին պատկանող դրամապանակում, որտեղ ներկայումս կա մոտ 6 հազար BTC։ Հիմնադրամը պարբերաբար իրականացնում է բիթքոյնի վաճառք՝ առանձին խմբաքանակներով։