Հայաստանի ազգային հավաքականն ավարտեց մրցելույթները Դուբայում ընթացող բռնցքամարտի տղամարդկանց աշխարհի առաջնությունում։ Կիսաեզրափակիչ մտած մեր հինգ բռնցքամարտիկները չհաղթահարեցին նախավերջին արգելքը եւ բոլորն էլ տուն կվերադառնան բրոնզե մեդալով։
Արթուր Բազեյանից եւ Հովհաննես Բաչկովից հետո, 86 կգ քաշային Ռաֆայել Հովհաննիսյանի մենամարտը բելառուս Ալեքսեյ Ալֆյորովի հետ չստացվեց, չնայած բավականին դիտարժան պայքար էր ակնկալվում։ Առաջին ռաունդում մեր մարզիկը հարվածների փոխանակման ժամանակ մի ակնթարթ կորցրեց զգոնությունը եւ ուժգին հարված ստանալով՝ ի վիճակի չեղավ շարունակել մարտը։
Միավորներով պարտություն կրեցին 51 կգ քաշային Ռուդոլֆ Գարբոյանը, որը հավասար պայքարում զիջեց օլիմպիական խաղերի չեմպիոն, Ուզբեկստանի ներկայացուցիչ Հասանբոյ Դուսմատովին, եւ գերծանր քաշային Դավիթ Չալոյանը, որը զիջեց ուզբեկ Արման Մախանովին։
Այսպիսով, Հայաստանի հավաքականը առաջին անգամ աշխարհի միեւնույն առաջնությունում նվաճեց հինգ բրոնզե մեդալ։
Աշոտ ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: