Կոռուպցիայի դեմ պայքարում տեղի ունեցող բացահայտումները միշտ չէ, որ նշանակում են կոռուպցիայի աճ, այլ կարող են վկայել այն մասին, որ համակարգն ավելի արդյունավետ է դարձել՝ նման դեպքերը բացահայտելու համար։
Հակակոռուպցիոն ոլորտում 2025 թվականին իրականացված աշխատանքների և առաջիկա անելիքների վերաբերյալ համաժողովի ժամանակ այս մասին ասաց Արդարադատության նախարար Սրբուհի Գալյանը։
«Մենք որքան շատ ենք խոսում կոռուպցիայի մասին, որքան շատ ենք հրապարակում ձերբակալությունների և կաշառքի մեղադրանքների մասին տեղեկություններ, այնքան տպավորություն է ստեղծվում, թե կոռուպցիան աճում է։ Բայց դա միանշանակ չէ, քանի որ նման հրապարակումներն ու բացահայտումները կարող են նշանակել, որ ունենք մեխանիզմներ, որոնք կարողանում են հայտնաբերել այդ հանցավոր երևույթները»,- «Արմենպրես»-ի փոխանցմամբ՝ ասաց Գալյանը։
Նախարարն ընդգծեց, որ կոռուպցիայի դեմ արդյունավետ պայքարը պահանջում է երկարատև աշխատանք։
«Ես՝ որպես քաղաքականություն մշակող և պետական համակարգի գործընթացներին մոտ կանգնած մարդ, տեսնում եմ որոշակի առաջընթաց։ Իհարկե, այդ առաջընթացը խոշոր քայլերով չի լինում, և յուրաքանչյուր առաջընթաց պահանջում է ժամանակ»,- ասաց Գալյանը։
Գալյանի խոսքով՝ ամենակարևորն այն քաղաքական կամքն ու հանձնառությունն է, որը դրսևորվում է պետության կողմից։