Ազատ գյուղում զորամասի կացարանի հրդեհի գործով այսօր դատարանն ուսումնասիրեց գործում առկա գրավոր ապացույցները: Դրանցից ուշագրավ էր հատկապես այն ապացույցը, որ 2022-23 թթ ինժեներասակրավորների վաշտին վառելիք չի հատկացվել: Ազատ գյուղի կացարանը պետք է ջեռուցվեր էլեկտրական տաքացուցիչներով, սակայն համապատասխան տաքացուցիչներ Գլխավոր շտաբից ( ԳՇ) չեն տրամադրվել:
Տուժողների ներկայացուցիչ Նորիկ Նորիկյանը ներկայացված ապացույցի մասին ներկայացրեց իր դիտարկումները. «Ապացույցով հիմնավորվում է, որ ինժեներասակրավորային վաշտի անձնակազմին 2022-23թթ կացարանում ջեռուցումն ապահովելու համար որեւէ վառելիք, վառելանյութ չի հատկացվել, ենթադրաբար, կացարանը պետք է ջեռուցվեր ջեռոցների միջոցով: Այդ ձմեռը պետք է ընդհանրապես վառարան չլիներ կացարանում: Եթե ջեռուցումը իրականացվեր էլեկտրական ջեռոցներով, հնարավոր է՝ այս ողբերգությունն էլ տեղի չունենար»:
Նորիկ Նորիկյանը նաեւ նկատեց, որ կացարանի հրդեհից մեկուկես ամիս առաջ էր Զինված ուժերի (ԶՈՒ) թիկունքի պետը անհրաժեշտ փորձաքննություններից հետո եզրահանգման եկել, որ հակահրդեհային համակարգը Զինված ուժերում փնթի ու ահավոր վիճակում է:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: