Քաղաքական մեկնաբան Հակոբ Բադալյանի թելեգրամյան գրառումը. «Կրեմլում Պուտինի հետ Սթիվ Ուիտկոֆֆի բանակցությունը տևել է ավելի քան հինգ ժամ: Հանդիպումից հետո ՌԴ նախագահի օգնական Ուշակովը հայտարարել է, որ կողմերը պայմանավորվել են չհանրայնացնել բանակցության էությունը: Ուշակովը նաև հայտարարել է, որ դեռ կա կատարելու շատ աշխատանք: Ըստ Ուշակովի, ռուսական կողմը ինչ որ բաների հետ համաձայն է, իսկ որոշ բաներ առաջացնում են քննադատություն:
Ի՞նչ է հնարավոր ասել այս կապակցությամբ: Պուտինը ռազմադաշտում ունի առավելություն և, իհարկե, թելադրելու է կանոններ: Սա պարզ տրամաբանություն է: Հնարավո՞ր է նրան հասցնել տնտեսական այնպիսի վիճակի, որ ստիպված լինի կանգնել ռազմական առումով: Տեսականում՝ այո, գործնականում՝ ոչ, որովհետև կան Չինաստան և Հնդկաստան, նվազագույնը:
Միևնույն ժամանակ, նույնիսկ Եվրոպան պատրաստ չէ լիովին հրաժարվել ռուսական նավթ ու գազից, որքան էլ դրա ծավալը հասցրել է նվազագույնի: Դրան գումարած, առանցքային է Թրամպի գործոնը, որի համար Պուտինը անուղղակի, թե ուղղակի, բայց կարևոր «հենակետ» է եվրաատլանտյան թևում իր քաղաքական դիրքերը պահպանելու համար:
Նա թերևս մտածում է, որ Ուկրաինայի «ձեռամբ» հաղթել Ռուսաստանին միևնույն է չի ստացվելու, իսկ Ռուսաստանի հետ պատերազմի մեջ մտնելու դեպքում էլ չի ստացվելու հաղթել եվրաատլանտյան գլոբալիստներին:
Ուշակովը հայտարարել է, որ հանդիպմանը Սթիվ Ուիտկոֆն ու փեսա Քուշները Թրամպի ողջույնն են փոխանցել Պուտինին, Պուտինն էլ հանդիպման ավարտին իր ողջույնը, և, ուշադրություն՝ մի շարք քաղաքական ազդակներ է փոխանցել Թրամպին:
Ամփոփելով, առաջիկայում թերևս Զելենսկուն հեռացնելու հարցը կմտնի եզրափակիչ փուլ՝ ռազմաճակատում իրավիճակի առավել բարդացմանը զուգահեռ»: