Իրանի արտաքին գործերի նախարար Աբբաս Արաղչին հայտարարել է, որ Թեհրանն ու Անկարան՝ որպես երկու խոշոր տարածաշրջանային տերություններ, հանձնառու են սերտ համագործակցություն իրականացնել՝ տարածաշրջանում կայուն խաղաղություն, կայունություն և զարգացում խթանելու համար, հաղորդում է Mehr-ը։
Արաղչին պատմել է, որ երեկ Թեհրանում ընդունել է Թուրքիայի արտաքին գործերի նախարար Հաքան Ֆիդանին և նրան ուղեկցող պատվիրակությանը։
Նա նշել է, որ «բացարձակապես ջերմ և կառուցողական մթնոլորտում կողմերը դիտարկել են երկկողմ հարաբերությունների աճող ուղեծիրը և վերահաստատել երկու երկրների ղեկավարների կայուն վճռականությունը՝ տնտեսական, առևտրային, էներգետիկ, տեխնոլոգիական, անվտանգության և մշակութային ոլորտներում համագործակցությունը խորացնելու համար»։
Նա հավելել է, որ երկու կողմերն էլ «խորը մտահոգություն են արտահայտել Գազայի և Արևմտյան ափի աղետալի իրավիճակի կապակցությամբ, վճռականորեն դատապարտել են իսրայելական ռեժիմի կողմից իրականացվող ցեղասպանությունը և համաձայնել են, որ հրատապ անհրաժեշտություն կա՝ այդ հանցագործությունները դադարեցնելու և միջազգային հարթակներում ռեժիմին պատասխանատվության ենթարկելու համար»։
Սիրիայում և Լիբանանում տեղի ունեցող իրադարձությունների մասին խոսելիս՝ Արաղչին շեշտել է, որ երկու երկրներն էլ «ընդգծում են այդ պետությունների ազգային ինքնիշխանության, տարածքային ամբողջականության և միասնության լիակատար հարգանքը և վճռականորեն դատապարտում են շարունակվող իսրայելական ագրեսիան»։