10 հոկտեմբերի 2025 – 15:10 AMT
PanARMENIAN.Net – Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Դուշանբեում կայացած ԱՊՀ գագաթնաժողովի շրջանակում քննարկում են ունեցել՝ նվիրված խաղաղ գործընթացի հնարավոր զարգացումներին։ Այդ մասին հայտնել է ԱՊՀ գլխավոր քարտուղար Սերգեյ Լեբեդևը։
«Հայաստանի վարչապետն ու Ադրբեջանի նախագահը շատ ջերմ շփվել են և քննարկել են հարցեր, թե ինչպես հետագայում առաջ շարժվեն խաղաղության, անվտանգության ճանապարհով»,- ասել է Լեբեդևը, հայտնում է ՏԱՍՍ–ը:
«Ինքներդ տեսաք՝ Հայաստանի վարչապետն ու Ադրբեջանի նախագահը շատ ջերմ շփվում էին։ Նրանք քննարկում ոչ թե վիճելի հարցեր, այլ թե ինչպես առաջ գնալ Հարավային Կովկասի տարածաշրջանում խաղաղության, անվտանգության ամրապնդման ճանապարհով», – ասել է Լեբեդևը, գրում է ՌԻԱ Նովոստին։
Փաշինյան–Ալիև վերջին հանդիպումը տեղի էր ունեցել մի քանի օր առաջ՝ հոկտեմբերի 2–ին։
Վարչապետ Նիկոլ Փաշինյանը և Ադրբեջանի նախագահ Իլհամ Ալիևը հոկտեմբերի 2-ին Կոպենհագենում Եվրոպական քաղաքական համայնքի 7-րդ գագաթնաժողովի շրջանակներում կայացած հանդիպմանը կարևորել են վստահություն ձևավորող միջոցառումների հետագա իրականացումը և տարածաշրջանում տրանսպորտային հաղորդակցության օգուտները։
Կողմերն ընդգծել են ԱՄՆ նախագահ Դոնալդ Ջ. Թրամփի նախաձեռնած Վաշինգտոնի խաղաղության գագաթնաժողովի պայմանավորվածությունների նշանակալիությունը։ Նրանք վերահաստատել են պատրաստակամությունը շարունակելու աշխատանքը Հայաստանի և Ադրբեջանի միջև խաղաղության հետագա ամրապնդման ուղղությամբ: