ՄԱԿ-ը չի ցանկանում այնպիսի սցենար, որի դեպքում Միացյալ Նահանգները կգրավի Իրանի Խարկ կղզին։ Այս մասին ճեպազրույցի ժամանակ հայտարարել է ՄԱԿ-ի խոսնակ Ստեֆան Դյուժարիկը իրավիճակի վերաբերյալ հարցին ի պատասխան։
«Ակնհայտ է, որ մենք չէինք ցանկանա տեսնել դա», – ասել է նա։ «Մենք կցանկանայինք տեսնել շարժումը հակառակ ուղղությամբ՝ դեպի դիվանագիտություն, այլ ոչ թե հետագա ոչնչացում»։
Հինգշաբթի օրը ԱՄՆ նախագահ Դոնալդ Թրամփը հայտարարել էր, որ ամերիկյան ուժերը մտադիր են փորձել վերահսկողություն հաստատել Իրանի Խարկ կղզու և Իսլամական Հանրապետության նավթային օբյեկտների նկատմամբ։ Ավելի ուշ, Fox News-ին տված հարցազրույցում նա հավելել է, որ Իրանի հետ կապված իրավիճակում ինքը միշտ կղզու գրավումը, որտեղ գտնվում են Իսլամական Հանրապետության հիմնական նավթային տերմինալները, համարել է նախընտրելի տարբերակ։ Այնուամենայնիվ, նա կասկածներ է հայտնել այն մասին, թե արդյոք ամերիկյան հանրությունը պատրաստ է Խարկի նկատմամբ վերահսկողություն հաստատելու համար շարունակական ռազմական գործողության։