Հանրապետութեան նախագահ Ժոզեֆ Աուն հեռաձայնեց Արաբական Միացեալ Էմիրութիւններու նախագահ Մոհամետ Պըն Զայետ Ալ Նահիանին եւ անոր հետ քննարկեց վերջին զարգացումներու լոյսին տակ Լիբանանի եւ շրջանին մէջ ներկայ կացութիւնները:
Հանրապետութեան նախագահը անոր յայտնեց, որ լիբանանցի ժողովուրդը շրջանին դիմագրաւած այս նուրբ պայմաններուն մէջ կը զօրակցի Արաբական Միացեալ Էմիրութիւններու եղբայրական ժողովուրդին:
Աուն Պըն Զայետին ներկայացուց Ուաշինկթընի մէջ գումարուող լիբանանեան-ամերիկեան-իսրայէլեան ժողովներու հոլովոյթի վերջին զարգացումները:
Արաբական Միացեալ Էմիրութիւններու նախագահը իր կարգին շնորհակալութիւն յայտնեց նախագահ Աունին իր ցուցաբերած կարեկցանքին համար` ընդգծելով, որ Արաբական Միացեալ Էմիրութիւնները միշտ եւ մասնաւորաբար ներկայ նուրբ փուլին կը կանգնի Լիբանանի եւ անոր ժողովուրդին կողքին:
Ան ընդգծեց, որ Արաբական Միացեալ Էմիրութիւնները կը զօրակցին անվտանգութեան ու կայունութեան հաստատման եւ իր բոլոր հողերուն վրայ իր գերիշխանութեան վերականգնման համար Լիբանանի որդեգրած քայլերուն: