Ռուսաստանի արտաքին գործերի նախարար Սերգեյ Լավրովը և Իրանի արտաքին գործերի նախարար Աբբաս Արաղչին հեռախոսազրույցի ընթացքում քննարկել են Թեհրանի շուրջ լարվածության թուլացման ուղղությամբ ձեռնարկվող քայլերը՝ հույս հայտնելով, որ Վաշինգտոնը կհրաժարվի վերջնագրերից և հակամարտության շուրջ երկխոսությունը կվերադարձնի դիվանագիտական ուղի։ Այս մասին նշվում է Ռուսաստանի արտաքին գործերի նախարարության կայքում։
«Ապրիլի 5-ին, իրանական կողմի նախաձեռնությամբ, հեռախոսազրույց է տեղի ունեցել Ռուսաստանի արտաքին գործերի նախարար Սերգեյ Լավրովի և Իրանի արտաքին գործերի նախարար Աբբաս Արաղչիի միջև», – հայտնել է նախարարությունը։
«Ռուսական կողմը հույս է հայտնել մի շարք երկրների կողմից Իրանի շուրջ լարվածության թուլացմանն ուղղված ջանքերի հաջողության վերաբերյալ՝ Մերձավոր Արևելքում իրավիճակի երկարաժամկետ և կայուն կարգավորման շահերից ելնելով, որին կնպաստի ԱՄՆ-ի կողմից վերջնագրերի լեզվից հրաժարվելը և իրավիճակը բանակցային ուղի վերադարձնելը»,-նշվում է հաղորդագրությունում։
Արաղչին և Լավրովը կոչ են արել խուսափել այնպիսի գործողություններից, որոնք կխաթարեն ճգնաժամի դիվանագիտական կարգավորման հնարավորությունները, այդ թվում՝ ՄԱԿ-ի Անվտանգության խորհրդի շրջանակներում։ Ռուսաստանի և Իրանի արտաքին գործերի նախարարները նաև ընդգծում են ԱՄՆ-ի և Իսրայելի կողմից Իրանի քաղաքացիական և միջուկային օբյեկտների վրա անխոհեմ հարձակումները անհապաղ դադարեցնելու անհրաժեշտությունը։