Ուքրանիոյ նախագահ Վոլոտիմիր Զելենսքի «Ռոյթըրզ» լրատու գործակալութեան հետ հարցազրոյցի ընթացքին յայտնեց, որ Միացեալ Նահանգներ խաղաղութեան համաձայնութեան համար իրենց կողմէ ապահովական երաշխիքներու տրամադրումը պայմանաւորեցին Քիեւի Տոնպասի շրջանը ամբողջութեամբ Ռուսիոյ զինջելով:
Զելենսքի նշեց, որ Միացեալ Նահանգները ներկայիս կեդրոնացած են Իրանի հետ իրենց հակամարտութեան վրայ, եւ Միացեալ Նահանգներու նախագահ Տանըլտ Թրամփ Ուքրանիոյ վրայ ճնշում կը բանեցնէ` փորձելով արագացնել չորս տարի առաջ սկսած պատերազմի աւարտը:
«Միջին Արեւելքը հաստատօրէն կ՛ազդէ նախագահ Թրամփի վրայ, եւ կը կարծեմ, որ անոր յաջորդ քայլերուն վրայ կ՛ազդէ: Ցաւօք, իմ տեսակէտովս, նախագահ Թրամփը տակաւին ուքրանական կողմին վրայ յաւելեալ ճնշում բանեցնելու ռազմավարութիւնը կ՛ընտրէ», ըսաւ ան:
Զելենսքի նշեց, որ տակաւին չեն լուծուած անվտանգութեան երաշխիքներու վերաբերեալ երկու հարցեր` այն, թէ ո՛վ պիտի օգնէ Ուքրանիոյ իր զսպիչ զինուորական ուժը պահպանելու համար զէնքերու գնման, եւ անոր դաշնակիցները ճիշդ ինչպէ՞ս պիտի հակազդեն ապագային ռուսական որեւէ յարձակումի մը:
«Ամերիկացիները պատրաստ են բարձր մակարդակի վրայ այդ երաշխիքներուն վերջին բարեփոխումները կատարելու, երբ Ուքրանիան պատրաստ ըլլայ Տոնպասէն հեռանալու», յայտնեց Ուքրանիոյ նախագահը:
Զելենսքի զգուշացուց, որ Տոնպասէն հեռացումը պիտի վտանգէ Ուքրանիոյ, ուստի նաեւ Եւրոպայի անվտանգութիւնը, որովհետեւ շրջանին մէջ պաշտպանական հզօր դիրքերը Ռուսիոյ զիջելու պիտի յանգեցնէ:
«Շատ կ՛ուզեմ, որ ամերիկեան կողմը հասկնայ, թէ մեր երկրին արեւելեան մասը մեր ապահովական երաշխիքներուն մէկ մասն է», նշեց Ուքրանիոյ նախագահը: