Հայաստանի ֆութպոլի ազգային խումբը իր մարզչական անձնակազմին մէջ փոփոխութիւններ կատարեց հաւաքէն առաջ:
Ֆիզիքական պատրաստութեան նոր մարզիչ նշանակուեցաւ սերպ մասնագէտ Փրետրակ Պոժիչ:
43 տարեկան Պոժիչ նախապէս աշխատած է Սերպիոյ ազգային խումբին հետ, ինչպէս նաեւ Պելկրատի Փարթիզան ակումբին հետ, ուր ինքզինք հաստատած է իբրեւ ֆիզիքական պատրաստութեան փորձառու մարզիչ:
Այս պաշտօնին վրայ Պոժիչ փոխարինած է սպանացի Խաւիէ Մինիանոն, որ նոր պաշտօն ստացաւ Սպանիոյ ֆետերասիոնին մօտ:
Մինիանօ, որ 7 տարի բոլորեց Հայաստանի ազգային խումբին հետ, նախապէս 2010-ի մոնտիալը շահած Սպանիոյ ֆիզիքական պատրաստութեան մարզիչն էր:
Պոժիչ արդէն իսկ միացած է Հայաստանի ազգային խումբին եւ այսօր կը սկսի մարտի հաւաքը` պատրաստուելու համար Պիելոռուսիոյ դէմ բարեկամական մրցումին:
Նշենք, որ Հայաստան – Արաբական Միացեալ Էմիրութիւններ մրցումը ջնջուած է, վերջինիս մէջ տիրող անկայուն վիճակին պատճառով, Միջին Արեւելքի մէջ տեղի ունեցող պատերազմին լոյսին տակ:
Յիշեցնենք, որ գլխաւոր մարզիչ Եղիշէ Մելիքեան ընտրած էր հաւաքականի ամբողջական կազմը, որ մասնակցի մարզական հաւաքին` Պիելոռուսիոյ դէմ (29 մարտին) մրցումին համար:
ԲԵՐԴԱՊԱՀՆԵՐ.- Հենրի Աւագեան (Փիւնիկ), Արսէն Բեգլարեան (Ալաշկերտ), Արման Ներսէսեան (Արարատ – Արմենիա) եւ Գոռ Մատինեան (Ուրարտու):
ՅԵՏՍԱՊԱՀՆԵՐ.- Կամօ Յովհաննիսեան (Արարատ – Արմենիա), Սերկէյ Մուրատեան (Նոա), Գէորգի Յարութիւնեան (Փուշքաշ Ակադեմիա), Արտեոմ Բանդիկեան, (Մոսկուայի բանակայիններ), Նայիր Թիկնիզեան (Կարմիր Աստղ Պելկրատ), Էտկար Գրիգորեան (Արարատ – Արմենիա), Էդիկ Փիլոյեան (Ուրարտու), Ստիոպա Մկրտչեան (Նիւրեմպերկ, Գերմանիա), Խուլիօ Պուենօ (Արարատ – Արմենիա):
ՄԻՋՆԱՊԱՀՆԵՐ.- Էդուարդ Սփերձեան (Կրասնոտար), Կարլեն Յովհաննիսեան (Փիւնիկ), Տիգրան Աւանէսեան (Օրենպուրկ), Արթուր Ասկարեան (Երեւանի Բանակայիններ), Կարէն Նալպանտեան (Ալաշկերտ) եւ Գոռ Մանուէլեան (Նոա):
ՅԱՌԱՋԱՊԱՀՆԵՐ.- Վահան Պիչախչեան (Լեկիա Վարշաւա), Հրանդ-Լէոն Ռանոս (Այնթրախթ Պրաունշվայկ), Արթուր Սերոբեան (Արարատ – Արմենիա), Նարեկ Գրիգորեան (Ֆարուլ), Նարեկ Յովհաննիսեան (Երեւանի Բանակայիններ), Ֆին Կիրակուսեան (Սանտըրլենտ) եւ Կարէն Մելքոնեան (Ուրարտու):