Լիբանանի դէմ շղթայազերծուող իսրայէլեան յարձակումներուն լոյսին տակ Լիբանանի խորհրդարանը երէկ արտակարգ նիստ մը գումարելով երկու տարիով երկարաձգեց իր գործունէութեան աւարտի ժամկէտը 76 ձայներու մեծամասնութեամբ: 41 երեսփոխաններ դէմ քուէարկեցին, իսկ 4 երեսփոխաններ սպիտակ քուէ նետեցին:
Խորհրդարանի այս քայլին դէմ կարգ մը երեսփոխաններ քննադատական կեցուածքով մերժեցին կատարուածը: Ազգային ազատ հոսանք կուսակցութեան ղեկավար Ժըպրան Պասիլ մերժելով պատահածը յայտնեց, որ զայն չեղարկելու դիմում պիտի ներկայացնէ: «Ամէն քայլի պիտի դիմենք` կասեցնելու համար այս խեղկատակութիւնը», ընդգծեց երեսփոխան Պասիլ:
Նմանապէս եւ Փաղանգաւոր կուսակցութիւնը դէմ արտայայտուեցաւ խորհրդարանի պաշտօնավարութեան երկու տարիով երկարաձգումին: