Արմավիրի մարզում այս ձմռանը գայլերի հարձակումից հոշոտվել է շուրջ 110 ոչխար՝ վնաս հասցնելով 2 տնտեսության: Ոչխարաբուծությունն այդ տնտեսվարողների հիմնական զբաղմունքն է, ապրուստի միջոցը: Գայլերի հարձակումից տուժել էին Արգինա գյուղից Հարություն Ասատրյանի ու Քարակերտ գյուղից Աղասի Սիրեկանյանի ոչխարները: Բոլոր ոչխարներն էլ հղի են եղել, որոնք ծնելու էին փետրվար և մարտ ամիսներին: Գայլերի հասցրած վնասը մեղմելու նպատակով Բաղրամյանի ավագանին երկու տնտեսություններին հատկացրել է 300 հազարական դրամ:
Ձմռանը կեր փնտրելու նպատակով երբեմն գայլերը հասնում են գյուղներ և թիրախավորում ոչխարներին: Այս նոր տարվան այդպիսի դեպք էր գրանցվել Քարակերտում: Գայլերը տան բակում հոշոտել էին շուրջ 50 գլուխ ոչխար: Աղասի Սիրեկանյանը պատմում է, որ դեպքը տեղի է ունեցել հունվարի 4-ի ցերեկը, երբ գնացել էր կերակրելու ոչխարներին:
«Օրը երկու անգամ ոչխարների մեջ եմ լինում՝ կեր եմ տվել, ջուր: Մինչև ցերեկվա 4-ը նորմալ է եղել, ես գոմում ջուր էի լցնում, տունը մարդ եկավ, գնացի: Մինչև ճանապարհեցի ու դուրս եկա՝ խոտ էի փռել, որ ուտեին, տեսա արդեն գայլը հոշոտել էր: 41 գլուխ տեղում սատկել էր այդ օրը, մի 9 գլուխ էլ, որոնց վզերը ծակել էր՝ տարբեր օրերի սատկեցին, չապրեցին»:
Ոչխարները պահում է գոմին կից փարախում: Նոր տարվա ձնառատ օրերին ոչխարների հոտը դաշտ չի տարել: Սովորաբար գիշերը պահում է գոմում, ցերեկը՝ փարախում: Գայլը մտել էր փարախ ու հանգիստ որս արել: Աղասին զարմացած է, ասում է՝ եղել է դեպք, որ գայլերը գիշերով են մտել գոմ, բայց ցերեկվա ժամին քիչ է պատահել, որ գյուղ մտնի:
«Պատնեշի վրայից էր թռել, մի ոչխար քաշել էր, ընկել դարպասի ու ձողի արանքը, չէր կարողացել անցկացնել, տեղում կերել էր»:
Ասում է՝ շների հաչոցները լսել է, բայց մտքով չի անցել, որ վտանգի տակ են ոչխարները: Ոչխարաբուծությամբ զբաղվողները սովորաբար «Կովկասյան գամփռ» ցեղատեսակի շների ուղեկցությամբ են դուրս գալիս արոտ, իսկ երեկոյան շներին կապում են: Այդ օրը շները նույնպես կապված են եղել:
Ոչխարաբուծությունը Աղասու ընտանիքի միակ զբաղմունքն է, եկամուտը դրանց վաճառքից է ստանում: Գայլերից հոշոտված ոչխարները հղի էին:
«100 գլուխ ոչխար ունեի, հիմա մնացել է 43 գլուխ, նրանցից 15-ն արդեն ծնել է: Նոր են սկսել ծնել՝ փետրվարի 17-ից սկսվում է մինչև մարտի 10-ը»:
Շուկայում հղի ոչխարների գինն ավելի բարձր է՝ 95000-ից 100 000 դրամ: Ոչխարների ծնի շրջանը փետրվար և մարտ ամիսներն են: Գայլերը զգալի նյութական վնաս են հասցրել տնտեսվարողին:
Հիմա Աղասն ամեն օր մնացած ոչխարներին արոտ է տանում Քարակերտ գյուղի դաշտերում: Նրա ընտանիքը նպաստառու է: Գայլերի հասցրած վնասը որոշակի չափով մեղմելու նպատակով Բաղրամյանի ավագանու որոշմամբ նրան հատկացվել է 300 հազար դրամ:
«Ես հիմա, որտեղ, որ ապրում եմ, դա եղբորս տունն է, հորս տնից առանձնացել եմ: Ունեմ 3 անչափահաս երեխա, 5 հոգի ենք»:
Նոյեմբերի վերջին այդպիսի դեպք է գրանցվել նույնպես Բաղրամյան համայնքի Արգինա գյուղում՝ վնասելով շուրջ 60 ոչխար: Այս անգամ գայլը հարձակվել էր գիշերով, գոմի ապակե պատուհանը կոտրելով: Արգինա գյուղի վարչական ղեկավար Ռուստամ Արոյանն ասում է, որ գյուղում ոչխար պահողներ կան, գայլերի հարձակումներ 2-3 տարին մեկ անգամ լինում է, բայց այս չափի վնաս երբևէ չէր եղել:
«Այս անգամ վնասը շատ էր՝ մի 60 գլուխ ոչխար, որոնք պետք է ծնեին: Մայր ոչխարներ էին»:
Բաղրամյանի համայնքապետարանը 300 հազար դրամ էլ հատկացրել գայլերից վնաս կրած Արգինա գյուղի բնակիչ Հարություն Ասատրյանին:
«Ոչխարաբույծը մի գյուղացու հետ պայմանագիր էր կնքել, որպեսզի 3 ոչխար ու 3 գառ գնի, համայնքապետարանն էլ այդքանով օգնել է»:
Ոչխարաբուծությունը գյուղացիների համար ձեռնտու զբաղմունք է, ծախսը քիչ, եկամուտը շատ՝ հաշվի առնելով նաև գլխաքանակի անկումները, որոնք տարվա ընթացում այդքան էլ շատ չեն: Ամռանը սարերում գայլերի հարձակումներ դարձյալ լինում են, որ ոչ զանգվածային չափերի: