Iravaban.net-ը ուսումնասիրել է Իրավական ակտերի նախագծերի հրապարակման e-draft.am կայքում հանրային քննարկման դրված «Երևան քաղաքի Ծովակալ Իսակովի պողոտա – Արշակունյաց պողոտա ճանապարհահատվածում առկա գույքերի նկատմամբ հանրության գերակա շահ ճանաչելու մասին» ՀՀ կառավարության որոշման նախագիծը։
Նախագիծը մշակվել է՝ հիմք ընդունելով Հայաստանի Հանրապետության հողային օրենսգրքի 61-րդ հոդվածը, «Հանրության գերակա շահերի ապահովման նպատակով սեփականության օտարման մասին» ՀՀ օրենքի համապատասխան դրույթները, Երևանի գլխավոր հատակագիծը և 2023 թվականի նոյեմբերի 27-ին ՀՀ և Ասիական զարգացման բանկի միջև կնքված «Երևանի քաղաքային զարգացման ներդրումային ծրագիր» վարկային համաձայնագիրը։
Նախագծի նպատակն ու անհրաժեշտությունը․
Նախագիծը նպատակ ունի ապահովել Ծովակալ Իսակովի պողոտա – Արշակունյաց պողոտա ճանապարհահատվածի կառուցումը։ Արդյունքում նախատեսվում է՝
- շարունակել Մոնթե Մելքոնյան փողոցի կառուցված ճանապարհը և կապել այն Արշակունյաց պողոտային,
- նվազեցնել մայրաքաղաքի կենտրոնի տրանսպորտային ծանրաբեռնվածությունը,
- կրճատել երթևեկության տևողությունը և խցանումները, ապահովելով անվտանգ ու արդյունավետ երթևեկություն,
- իրականացնել «Երևանի քաղաքային զարգացման ներդրումային ծրագիր»-ի շինարարական հատվածը՝ Ասիական զարգացման բանկի և ՀՀ պետական միջոցների ֆինանսավորմամբ։
Առկա իրավիճակ և խնդիրներ․
- Ծրագիրը ֆինանսավորվում է 85,67 միլիոն ԱՄՆ դոլար վարկային համաձայնագրով (ներկայացվող ճանապարհահատվածի պետական ֆինանսավորում՝ 20,5 միլիոն ԱՄՆ դոլար),
- Նախատեսված է ավարտը՝ 2028 թ. մարտի 30-ը,
- Նախագծի նախահաշվային փաստաթղթերը պատրաստ են, շինարարության թույլտվությունը ստացված է, մրցույթներ են անցկացվել շինարարական և տեխնիկական հսկողության խորհրդատուների համար,
- Շինարարական աշխատանքները նախատեսվում է սկսել 2026 թ. գարնանը, ուստի անհրաժեշտ է ապահովել գույքների օտարման գործընթացը։
Օտարման անհրաժեշտությունը․
ՀՀ կառավարությունը 2023 թ. օգոստոսի 11-ին որոշել է 27 անշարժ գույքների նկատմամբ ճանաչել հանրության գերակա շահ։ Սակայն հետազոտման և տեղամասային վերլուծության արդյունքում պարզվել է, որ որոշ գույքներ չեն ընդգրկվել նախկին որոշման մեջ կամ գերակա շահի ռեժիմը կորցրել է ուժը։ Նախագծով առաջարկվում է 5 գույքերի նկատմամբ նորից ճանաչել հանրության գերակա շահ՝ ծրագրի ամբողջական իրականացման համար։
Օտարման ենթակա գույքեր․
| NN
ը/կ |
Վարչական շրջանը | Գույքի հասցեն | Հողամասի կադաստրային
ծածկագիրը |
Սեփականատերը |
| 1․ | Շենգավիթ | Կաշեգործների փող,468 | 01-011-0066-0131 | քաղաքացի |
| 2․ | Շենգավիթ | Կաշեգործների փող 466 | 01-011-0066-0132 | քաղաքացի |
| 3․ | Շենգավիթ | Կաշեգործների փ., 468/2 | 01-011-0054-0143 | քաղաքացի |
| 4․ | Կենտրոն | Ծովակալ Իսակովի պողոտա 10/6 | 01-006-0618-0019
|
քաղաքացի |
| 5․ | Շենգավիթ | Կաշեգործների փ., 474 | 01-011-0066-0133 | քաղաքացի |
Օտարման կարգավիճակ և ընթացակարգեր
- Օտարման բոլոր գործողությունները իրականացվում են ՀՀ կառավարության 2007 թվականի N 108-Ն որոշմամբ սահմանված կարգով և 2016 թվականի N 739-Ն որոշմամբ սահմանված արձանագրության օրինակելի ձևերով
Նախագծի հիմնական դրույթները․
- Հանրության գերակա շահ ճանաչումը
- Նախագծի 1-ին և 2-րդ հավելվածներում նշված գույքերը ճանաչվում են հանրության գերակա շահ ունեցող, որը գերակայում է սեփականատերերի շահերին։
- Սա հիմնավորվում է այն հանգամանքով, որ ճանապարհի կառուցման արդյունքում կկրճատվի կենտրոնի երթևեկության ծանրաբեռնվածությունը և կբարձրանա բնակչության անվտանգությունը և կյանքի որակը։
- Սեփականության ձեռք բերող և օտարման գործընթացը
- օտարվող սեփականության ձեռք բերողը Հայաստանի Հանրապետությունն է, որի անունից հանդես է գալիս Երևանի քաղաքապետը.
- սեփականության օտարման գործընթացն սկսելու վերջնական ժամկետը 2026 թվականի դեկտեմբերի 1-ն է.
- նախատեսված սեփականության օտարման գործառույթների իրականացումը համակարգող և սեփականության օտարման գործառույթների իրականացման համար պատասխանատու պետական լիազոր մարմնի գործառույթները պատվիրակվում են Երևանի քաղաքապետին.
- սույն որոշմամբ հանրության գերակա շահ ճանաչված տարածքների և դրանցում առկա սեփականության օբյեկտների նկարագրության արձանագրության կազմման և սեփականության օտարման գործառույթներն իրականացնում է Երևանի քաղաքապետը.
Ակնկալվող արդյունքներ
- Ծավալված ճանապարհահատվածի կառուցումը հնարավոր կլինի իրականացնել ամբողջությամբ և ժամանակին՝ առանց հետաձգումների:
- Շինարարական աշխատանքները կմեկնարկեն 2026 թ. գարնանը:
- Երևանի կենտրոնական փողոցների երթևեկությունը կբարելավվի, երթևեկության տևողությունը կկրճատվի, խցանումները կնվազեն:
- Օտարման գործընթացը կիրականացվի օրենքով սահմանված կարգով՝ բացառելով լրացուցիչ բյուրոկրատական խոչընդոտները:
- ՀՀ պետական և տեղական բյուջեների վրա լրացուցիչ ֆինանսական ազդեցություն չի սպասվում:
Ռազմավարական կապը․
- Նախագիծը համահունչ է Երևանի ավագանու 2024–2028 թթ. զարգացման ծրագրին և Երևանի գլխավոր հատակագծին՝ Իսակով-Արշակունյաց ճանապարհի կառուցումը առաջնահերթություն է:
- Համապատասխանում է ՀՀ կառավարության 2021–2026 թթ. ծրագրի կետերին, որոնք ընդգծում են ճանապարհային ցանցի զարգացումը, տնտեսության և սոցիալական կյանքի բարելավումը, մարդկանց կենսական մակարդակի բարձրացումը: