Փյունիկ զարգացման կենտրոնում բացվեց նկարչուհի Մայա Սահակյանցի անհատական ցուցահանդեսը՝ «Նրանք» խորագրով։ Ցուցադրության մեջ ընդգրկված աշխատանքները բացում են մարդու ներաշխարհի այն շերտերը, որոնք հաճախ մնում են անտեսանելի՝ ցավը, լռությունը, սպասումը, հոգևոր ծանրությունը։
Մայա Սահակյանի նկարներում կերպարները անանուն են․ նրանք չունեն կոնկրետ պատմություններ կամ ժամանակային պատկանելիություն։ «Նրանք» հավաքական կերպարներ են՝ մարդկային տարբեր վիճակների խորհրդանիշներ։ Փակ կամ ներս ուղղված հայացքները, խեղդված շարժումները և մարմինների կծկված դիրքերը խոսում են ներքին պայքարի, ինքնամփոփվածության և մենության մասին։
Ցուցահանդեսը դիտողին չի պարտադրում պատրաստ պատասխաններ․ այն հրավիրում է խորհելու, ճանաչելու և սեփական ներսի «նրանց» հանդիպելու։ Ցուցահանդեսը բաց կլինի մինչև փետրվարի 10֊ը, մուտքն ազատ է։