Զինծառայողներին զրկում են հոգևոր կարիքներից՝ զուտ իրենց քաղաքական շահերից ու նկատառումներից ելնելով ու վերջնականապես բարոյազրկելով բանակը․ Ժաննա Ալեքսանյան

Լրագրողներ հանուն մարդու իրավունքների ՀԿ նախագահ Ժաննա Ալեքսանյանի ֆեյսբուքյան գրառումը

Զինծառայողը հոգևոր կյանքի, հոգևոր ուժի կարիք ունի, այդպես է փակ համակարգերում, ազատազրկման վայրերում, բայց բանակում առավելապես, որտեղ տարբեր վտանգներ են կախված զինծառայողի գլխին՝ պատերազմից մինչև խաղաղ պայմաններ։ Պատերազմում հերոսաբար զոհված Տիգրան Ավետիսյանը 13 օր խաչքարը մեջքին մարտի դաշտում է եղել՝ ապավինելով խաչի զորությանն ու պաշտպանությանը։

Նրանց կողքին են եղել բանակում նվիրումով իրենց ծառայությունն իրականացնող քահանաներն ու սարկավագները, որոնք նաև իրենց կյանքն են տվել հայրենիքի համար։ Խաղաղ պայմաններում զոհված զինծառայողների օրագրերում և զինվորական հագուստի գրպաններում աղոթքներ և խաչեր են գտել նրանց ընտանիքները։ Եվ հիմա, վռնդելով զորամասերում գործող հգևորականներին, բանակի վերնախավը Նիկոլ Փաշինյանի գլխավորությամբ, զինծառայողներին զրկում են հոգևոր կարիքներից՝ զուտ իրենց քաղաքական շահերից ու նկատառումներից ելնելով՝ վերջնականապես բարոյազրկելով բանակը։