ՆԱՏՕ-ի գլխավոր քարտուղար Մարկ Ռյուտեի և ԱՄՆ նախագահ Դոնալդ Թրամփի միջև չորեքշաբթի օրը կնքված շրջանակային համաձայնագիրը «դրական լուր» է։ Սակայն դա պաշտոնական համաձայնագիր չէ, քանի որ Գրենլանդիայի և Դանիայի ներկայացուցիչները ներկա չեն եղել բանակցություններին, ասել է կղզու արտաքին գործերի նախարար Վիվիան Մոտցֆելդտը։
«Գրենլանդիայի վերաբերյալ պաշտոնական համաձայնագիր չի կնքվել առանց Գրենլանդիայի կառավարության մասնակցության։ Դանիայի կառավարությունը նույնպես ներկայացված չի եղել հանդիպմանը», – Մոտցֆելդտի խոսքերն է մեջբերել Rutzau լրատվական գործակալությունը։ «Իմ կարծիքով, սա դրական լուր է Դավոսից։ Այնուամենայնիվ, մենք դեռ պետք է մեր վերապահումները անենք, և կասկած չկա, որ մենք դեռ շատ աշխատանք ունենք անելու»։
Նա նաև նշել է, որ Գրենլանդիայի կառավարությունը չի խնդրել Ռյուտեին բանակցել երկրի անունից։ «Սակայն գլխավոր քարտուղարը մեր դիրքորոշումն ու կարմիր գծերը փոխանցել է նախագահ Թրամփին», – հավելել է նախարարը։ Նրա խոսքով՝ այժմ հանդիպումներ կանցկացվեն Միացյալ Նահանգների, Գրենլանդիայի և Դանիայի միջև՝ անցյալ շաբաթ Վաշինգտոնում կայացած հանդիպման ժամանակ համաձայնեցված աշխատանքային խմբի շրջանակներում։
Axios-ի տվյալներով՝ Ռյուտեի կողմից ԱՄՆ նախագահ Դոնալդ Թրամփին առաջարկված Գրենլանդիայի համաձայնագրի նախագիծը կպահպանի Դանիայի ինքնիշխանությունը կղզու նկատմամբ, բայց կթարմացնի կղզու վերաբերյալ 1951 թվականի պաշտպանական համաձայնագրի պայմանները՝ թույլ տալով ԱՄՆ-ին կղզում ռազմական բազաներ կառուցել և «պաշտպանական գոտիներ» ստեղծել, եթե ՆԱՏՕ-ն անհրաժեշտ համարի։ Առաջարկը նաև նախատեսում է ԱՄՆ «Ոսկե գմբեթ» հակահրթիռային պաշտպանության համակարգի տարրերի տեղակայում Գրենլանդիայում և ԱՄՆ-ի կողմից իր ռազմական ներկայությունը մեծացնելու հնարավորություն։