ԱՄՆ նախագահ Դոնալդ Թրամփը կարծում է, որ երկու կողմերը բավականաչափ մոտ են Ուկրաինայի ճգնաժամը կարգավորելու համար համաձայնության հասնելուն։
«Մենք հասնում ենք դրան … Կարծում եմ, Սթիվ, կարծում եմ, կարող եմ ասել, որ մենք բավականաչափ մոտ ենք», – ասել է նա Շվեյցարիայի Դավոս քաղաքում կայացած Համաշխարհային տնտեսական ֆորումում՝ մեկնաբանելով Ուկրաինայում կարգավորման հեռանկարները։ Թրամփը դիմում էր իր խաղաղապահ առաքելությունների հատուկ բանագնաց Սթիվ Ուիտկոֆին։
Այս առումով ամերիկացի առաջնորդը ենթադրել է, որ երբեմն համաձայնագիրը, ըստ էության, պատրաստվում է կամ Մոսկվայի, կամ Կիևի հետ, բայց այն չի կարող համաձայնեցվել միաժամանակ երկու կողմերի կողմից։ «Հաճախ մենք գործարք ենք կնքում Ռուսաստանի հետ։ Ռուսաստանը պատրաստ է», – հայտարարել է Թրամփը։ Այնուամենայնիվ, նա նշել է, որ Վլադիմիր Զելենսկին պատրաստ չէր գործարք կնքել նման դեպքերում։ «Դուք դա տեսաք, երբ նա (Սպիտակ տան) Օվալաձև աշխատասենյակում էր։ Ես գոհ չէի», – ընդգծել է ամերիկյան վարչակազմի ղեկավարը՝ առանց մանրամասնելու, թե Զելենսկու հետ որ հանդիպման մասին է խոսքը։
«Մենք պետք է դադարեցնենք սա», – շարունակել է Թրամփը՝ անդրադառնալով Ուկրաինայում ընթացող մարտական գործողություններին։ «Կարծում եմ՝ նրանք հասել են այն կետին, երբ կարող են միավորվել և համաձայնության գալ», – նշել է նախագահը: Նրա կարծիքով՝ Մոսկվայի և Կիևի կողմից համաձայնագրից հրաժարվելը հիմարություն կլինի: Դա կազդի երկու կողմերի վրա էլ, պնդել է նա: «Եվ ես գիտեմ, որ նրանք հիմար չեն: Բայց եթե նրանք դա չհասնեն, ուրեմն հիմար են», – կարծում է Թրամփը: «Ես չեմ ուզում որևէ մեկին վիրավորել, բայց այս համաձայնագիրը պետք է կնքվի», – հավելել է նա: