Եւրոպական Ֆութպոլ. Սիթի Չկրցաւ Յաղթել Պրայթընին. Ինթեր Միլան Հաստատ Առաջին Դիրքի Վրայ

Անգլիոյ «Փրեմիեր լիկ»-ի 21-րդ հանգրուանի իր մրցումին, Մանչեսթըր Սիթի իր դաշտին վրայ չկրցաւ յաղթել Պրայթընին եւ բաւարարուեցաւ 1-1 արդիւնքով:

41-րդ վայրկեանին Էրլինկ Հաալանտ փենալթիով նշանակեց Սիթիի կոլը, իսկ Քաուրու Մեթոմա 60-րդ վայրկեանին Պրայթընի հաւասարութեան կոլը: Փեփ Կուարտիոլայի Սիթին այս ձեւով իր յաջորդական 3-րդ հաւասարութիւնը արձանագրեց:

Մանչեսթըր քաղաքի պատմական խումբը` Եունայթըտ իր կարգին չկրցաւ յաղթել եւ 2-2 արդիւնքով հաւասարութեամբ մեկնեցաւ Պըրնլիի դաշտէն:

Քանի մը օր առաջ պաշտօնանկ ընելէ ետք փորթուգալցի մարզիչ Ռուպեն Ամորիմը, Եունայթըտի նախկին մարզիկ Տերըն Ֆլեչըր ժամանակաւոր ձեւով ստանձնած էր մարզիչի պաշտօնը: Հաւանական է, որ Օլէ Կիւնար Սոլսքիար վերստին ստանձնէ Եունայթըտի մարզիչի պաշտօնը:

Ստորեւ` արդիւնքները.

Պըրնլի – Մանչեսթըր Եունայթըտ 2-2
Նիւքեսըլ – Լիծ 4-3
Պորնմաութ – Թոթենհամ 3-2
Պրենթֆորտ – Սանտըրլենտ 3-0
Քրիսթըլ Փելես – Ասթոն Վիլա 0-0
Էվըրթըն – Վուլվզ 1-1
Ֆուլհամ – Չելսի 2-1
Մանչեսթըր Սիթի – Պրայթըն 1-1
Ուեսթ Համ – Նոթինկհամ Ֆորեսթ 1-2

Իտալիոյ «Սերի Ա.»-ի 19-րդ հանգրուանի մրցումներուն, Ինթեր Միլան Փարմայի դաշտին վրայ 2 կոլ նշանակեց եւ ինքզինք հաստատեց դասաւորման պարագլուխի դիրքին վրայ:

Ֆետերիքօ Տիմարքօ եւ Մարքուս Թիւրամ նշանակեցին «Ներաձուրի»-ի կազմի կոլերը:

Հայաստանի ազգային խումբի բոլոր ժամանակներու լաւագոյն ռմբարկու Հենրիխ Մխիթարեան ամբողջ մրցումին ներկայ էր եւ բաւական լաւ ելոյթ ունեցաւ:

Անցեալ տարուան ախոյեան Նափոլի կարեւոր կէտեր կորսնցուց, երբ 2-2 արդիւնքով հաւասարութիւն արձանագրեց Վերոնայի հետ:

18-րդ դիրքը գրաւող Վերոնա 2-0 արդիւնքով յառաջացաւ մրցումի առաջին 27 վայրկեաններուն, բայց Բ. կիսախաղին Մաքթոմինէյ եւ Տի Լորենցօ կրցան առնուազն կէտ մը ձեռք ձգել ի նպաստ Նափոլիի, որ 4 կէտով ետ կը մնայ Ինթեր Միլանէն:

Ստորեւ` արդիւնքները.

Լացիօ Ռոմա – Ֆիորենթինա 2-2
Փարմա – Ինթեր Միլան 0-2
Թորինօ – Ուտինեզէ 1-2
Պոլոնիա – Աթալանթա 0-2
Նափոլի – Վերոնա 2-2
Սասուլօ – Եուվենթուս 0-3
Լեչէ – Ռոմա 0-2
Փիզա – Քոմօ 0-3