Ամփոփիչ ասուլիսում խոսելով մշակութային հուշարձանների ամրակայման, նորոգման համար տրամադրված պետական միջոցների մասին՝ ԿԳՄՍ նախարար Ժաննա Անդրեասյանն ասաց, որ 2022թ. 216 մլն դրամի համեմատ 2025-ին այդ նպատակով հատկացվել է 1 մլրդ 386 մլն դրամ։
«Խոսում ենք 23 հուշարձանի մասին, բայց մասնավորի հետ համագործակցությամբ էլ են հուշարձաններ վերականգնվում։ Ընդհանուր առմամբ՝ 48 հուշարձանի մասին է խոսքը»,-նշեց նախարարն ու հավելեց, որ դրանց մեջ մեծ թիվ են կազմում կրոնական բնույթի հուշարձանները։
Պատասխանելով լրագրողի հարցին՝ արդյո՞ք ապրիլի 24-ին բաց կլինի Հայոց ցեղասպանության հուշահամալիրը, նախարարն ասաց, որ այն բաց է եւ չի փակվելու նաեւ ապրիլի 24-ին:
Ժաննա Անդրեասյանը նշեց, որ ամեն շաբաթ ինքը լինում է հուշահամալիրում: Աշխատանքներն այնտեղ դադարեցված են եղել մի քանի օրով՝ դեկտեմբերի 31-ից հունվարի 4-ը:
«Հուշահամալիրը եւ թանգարանը բաց են, որեւէ օր եւ որեւէ ժամի չեն փակվել»,-ընդգծեց նա ու հավաստիացրեց, որ վերանորոգման աշխատանքները կավարտվեն սահմանված ժամկետներում:
Ասուլիսն՝ ամբողջությամբ.
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: