Ուրբաթ օր տեղի ունեցաւ 2026-ի մոնտիալի վիճակաձգութիւնը, Ուաշինկթընի մէջ: Հիւսիսային եւ Կեդրոնական Ամերիկայի ցամաքամասին մէջ տեղի ունենալիք Մոնտիալը ժամերու բաւական տարբերութեան պիտի հանդիպի` նկատի ունենալով, որ Միացեալ Նահանգներու Արեւմտեան շրջանէն Արեւելեան շրջան արդէն իսկ 3 տարբեր ժամային գօտիներ են, եւ ՖԻՖԱ ստիպուեցաւ ուսումնասիրել մրցումներու ժամերու տարբերութիւնը, եւ եւրոպական երկիրներու պարագային մրցումները տեղի պիտի ունենան գիշերուան ժամը 8:00-էն 12:00-ի միջեւ: Անշուշտ առաւօտեան ժամերուն ալ մրցումներ տեղի պիտի ունենան ժամը 2:00-էն 6:00-ի միջեւ:
Քառորդ աւարտականի մրցումները տեղի պիտի ունենան գիշերուան ժամը 10:00-ին, 11:00-ին, կէս գիշերին եւ առաւօտեան 4:00-ին:
Կիսաւարտականի մրցումները տեղի պիտի ունենան ժամը 10:00-ին, մինչ 3-րդ դիրքի մրցումը տեղի պիտի ունենայ կէս գիշերին, իսկ աւարտականը` ժամը 10:00-ին:
12 խմբակներու մէջ բաժնուեցան 42 խումբերը, մինչ մնացեալ 6 մասնակիցները պիտի յստականան մարտին տեղի ունենալիք փլէյ-օֆի մրցումներէն ետք:
9-րդ խմբակին մէջ Ֆրանսա իր դէմ պիտի ունենայ Էրլինկ Հաալանտի Նորվեկիան, Սենեկալը, ինչպէս նաեւ փլէյ-օֆէն շահած խումբ մը: Սուրինամ – Պոլիվիա մրցումին յաղթականը պիտի մրցի ընդդէմ Իրաքի, այնուհետեւ վերջնական յաղթականը պիտի միանայ 9-րդ խմբակին:
Հետաքրքրական կը թուին ըլլալ Սպանիոյ եւ Պրազիլի խմբակները, ինչպէս նաեւ Անգլիոյ խմբակը:
Եւրոպայի ախոյեան Սպանիա իր դէմ պիտի ունենայ Ուրուկուէյը, 8-րդ խմբակին մէջ, մինչ Պրազիլ Գ. խմբակին մէջ ունի Մարոքը: Այլ թեկնածու մը` Անգլիա, 12-րդ եւ վերջին խմբակին մէջ իր դէմ Խրուաթիան, Կանան եւ Փանաման պիտի ունենայ:
Վերջին Մոնտիալի ախոյեան (2022) Արժանթին թուղթի վրայ «դիւրին» մրցակիցներ ունի Ժ. խմբակին մէջ Ալճերիոյ, Յորդանանի եւ Աւստրիոյ հետ, մինչ Գերմանիա, Փորթուգալ եւ Նետերլանտներ համեմատաբար դիւրին մրցակիցներ ունին:
Մինչ այդ, ՖԻՖԱ-ի նախագահ Ճիաննի Ինֆանթինօ, որ ամիս մը առաջ «ստեղծած» էր խաղաղութեան մրցանակ մը, առանց ՖԻՖԱ-ի խորհուրդի քննարկման առանց անուանակարգերու, թեկնածուներու եւ նոյնիսկ քուէարկութեան, այդ մրցանակը յանձնեց Միացեալ Նահանգներու նախագահ Տանըլտ Թրամփին: Ըստ երեւոյթին Թրամփը ամէն ձեւով գոհ պահելու համար Ինֆանթինօ այս մրցանակը «նուիրեց» անոր` իբրեւ փոխհատուցում, մանաւանդ որ ան «կ՛երազէր» ստանալ Նոպելեան մրցանակը եւ յուսախաբ դարձած էր` Նոպելեան կոմիտէին կողմէ անտեսուած ըլլալուն համար:
Ստորեւ կը ներկայացնենք վիճակաձգութեան արդիւնքները.
Ա. ԽՄԲԱԿ
Մեքսիքա, Հարաւային Ափրիկէ, Հարաւային Քորէա, ինչպէս նաեւ եւրոպական փլէյ-օֆի (Իրլանտա, Չեխիա, Դանիա կամ Մակեդոնիա) յաղթականը:
Բ. ԽՄԲԱԿ
Քանատա, Քաթար, Զուիցերիա եւ փլէյ-օֆի եւրոպական յաղթականը (Իտալիա, Հիւսիսային Իրլանտա, Կարես կամ Պոսնիա):
Գ. ԽՄԲԱԿ
Պրազիլ, Մարոք, Հայիթի եւ Սկովտիա:
Դ. ԽՄԲԱԿ
Միացեալ Նահանգներ, Փարակուէյ, Աւստրալիա, փլէյ-օֆի յաղթական (Թուրքիա, Ռումանիա, Սլովաքիա կամ Քոսովօ):
Ե. ԽՄԲԱԿ
Գերմանիա, Էքուատոր, Փղոսկրեայ Ափունք եւ Քուրասաօ:
Զ. ԽՄԲԱԿ
Նետերլանտներ, Ճափոն, Թունուզ եւ փլէյ-օֆի յաղթական (Ուքրանիա, Շուէտ, Լեհաստան կամ Ալպանիա):
Է. ԽՄԲԱԿ
Պելճիքա, Եգիպտոս, Իրան, Նոր Զելանտա:
Ը. ԽՄԲԱԿ
Սպանիա, Քափէ Վերտէ, Սէուտական Արաբիա, Ուրուկուէյ:
Թ. ԽՄԲԱԿ
Ֆրանսա, Սենեկալ, Նորվեկիա եւ փլէյ-օֆի յաղթական (Իրաք, Պոլիվիա կամ Սուրինամ):
Ժ. ԽՄԲԱԿ
Արժանթին, Ալճերիա, Աւստրիա, Յորդանան:
ԺԱ. ԽՄԲԱԿ
Փորթուգալ, Ուզպեքիստան, Քոլոմպիա եւ փլէյ-օֆի յաղթական (Նոր Քալետոնիա, Ճամայքա կամ Քոնկօ):
ԺԲ. ԽՄԲԱԿ
Անգլիա, Խրուաթիա, Կանա, Փանամա: