Վարչապետ Նաուաֆ Սալամ շաբաթ օր Տոհայի ֆորումի բացման նիստէն ետք հանդիպում ունեցաւ Քաթարի շէյխ Թամիմ Պըն Համատ Ալ Թանի իշխանին հետ:
Քաթարի իշխանը հանդիպումի ընթացքին ընդգծեց, որ Քաթար կը շարունակէ Լիբանանին քաղաքական եւ տնտեսական աջակցութիւն ցուցաբերել` նշելով, որ Տոհա շուտով Լիբանանի աջակցութեան յատկացուած նոր ծրագիրներու շարք մը պիտի յայտարարէ:
Վարչապետ Սալամ իր կարգին իր գնահատանքը արտայայտեց Քաթարի Լիբանանին տրամադրած շարունակուող, մասնաւորաբար տնտեսական ու դիւանագիտական ոլորտներուն մէջ աջակցութեան համար եւ գնահատեց «Տոհայի դերը` Լիբանանի մէջ կայունութեան հաստատման եւ անոր օրինական հաստատութիւններու կարողութիւններու ամրապնդման ջանքերուն թիկունք կանգնելու համար»:
«Լիբանանեան բանակը կը շարունակէ կատարել իր սեփական ուժերով պետութեան իշխանութեան տարածման մէջ իր առաքելութիւնը` սկսելով Լիթանիի հարաւէն, ուր առաջին փուլը կը գտնուի ամբողջացման եզրին», ըսաւ ան:
Սալամ շեշտեց, որ անհրաժեշտ է աշխուժացնել դիւանագիտական ջանքերը` ճնշում բանեցնելու Իսրայէլի վրայ, որպէսզի դադրեցնէ իր յարձակումները եւ հեռանայ այն շրջաններէն, զորս տակաւին բռնագրաւուած կը պահէ` Քաթարի կոչ ուղղելով` շարունակելու այդ ջանքին մէջ եւ հարաւի մէջ կայունութեան ամրապնդման ձգտող միջազգային ջանքերու ամրապնդման մէջ իր դերը:
Վարչապետը ընդգծեց, որ իր կառավարութիւնը յանձնառու է բարեկարգումներու գործադրութեան եւ պետութեան գերիշխանութեան իր բոլոր հողերուն վրայ ամրապնդման մէջ յառաջ ընթանալու նկատմամբ` յայտնելով, որ ինք անհամբեր կը սպասէ յառաջիկայ շրջանին երկկողմանի գործակցութեան ոլորտներու ընդլայնման:
Վարչապետ Սալամ նաեւ հանդիպում ունեցաւ Քաթարի վարչապետ, արտաքին գործոց նախարար շէյխ Մոհամետ Պըն Ապտելռահման Ալ Թանիի հետ` ներկայութեամբ փոխվարչապետ Թարեք Մըթրիի:
Քաթարի վարչապետը ընդգծեց, որ Քաթար կը շարունակէ աջակցիլ Լիբանանին, եւ շուտով աջակցութեան ծրագիրներու նոր խումբ մը պիտի յայտարարուի:
Սալամ իր կարգին իր մեծ գնահատանքը արտայայտեց Լիբանանի աջակցութեան, անոր կայունութեան ամրապնդման եւ հաստատութիւններուն թիկունք կանգնելու մէջ Քաթարի դերակատարութեան նկատմամբ: