Բելառուսի մայրաքաղաք Մինսկում մեկնարկել է Հավաքական անվտանգության պայմանագրի կազմակերպության (ՀԱՊԿ) խորհրդարանական վեհաժողովի խորհրդին կից՝ անդամ երկրների խորհրդարանների պաշտպանության և անվտանգության հարցերով հանձնաժողովների նախագահների համակարգող խորհրդակցությունը։
Խորհրդակցությանը մասնակցող խորհրդարանականները քննարկում են հավաքական անվտանգության ապահովման արդիական հարցերը, ինչպես նաև կազմակերպության պատասխանատվության գոտում և հարակից տարածքներում ստեղծված ռազմաքաղաքական իրավիճակը։
Մասնակիցները քննարկում են նաև ժամանակակից մարտահրավերներին ու սպառնալիքներին հակազդելու համատեղ միջոցները, որոնք պահանջում են դաշնակից պետությունների համախմբված արձագանքը։
Հանդիպման հիմնական ուղղություններից է ՀԱՊԿ անդամ երկրների ազգային օրենսդրությունների կատարելագործումն ու ներդաշնակեցումը։
Օրակարգում ներառված են կազմակերպության ռազմական բաղադրիչի զարգացման իրավական ապահովման, պաշտպանունակության ամրապնդման, ինչպես նաև ռազմատեխնիկական համագործակցության հարցերը։
Առանձնահատուկ ուշադրություն է դարձվում օրենսդրական օրինակելի ակտերի և առաջարկությունների մշակմանը, որոնք հնարավորություն կտան ներդաշնակեցնել անդամ պետությունների իրավական կարգավորումները՝ հավաքական անվտանգության համակարգի ուժերի և միջոցների առավել արդյունավետ գործունեությունն ապահովելու նպատակով։