Ազգային ժողովի «Քաղաքացիական պայմանագիր» խմբակցության պատգամավոր Լուսինե Բադալյանին թույլ չեն տվել մուտք գործել Ռուսաստան, հայտնել է նա Facebook-ի իր էջում։
Բադալյանի խոսքով՝ հոկտեմբերի 14-ին նախատեսում էր մեկնել Սանկտ Պետերբուրգ՝ մասնակցելու հաջորդ օրը կայանալիք ԱՊՀ միջխորհրդարանական վեհաժողովի սոցիալական քաղաքականության և մարդու իրավունքների մշտական հանձնաժողովի նիստին։ Նա ԱՊՀ ՄԽՎ-ում Ազգային ժողովի պատվիրակության անդամ է։ Նիստի օրակարգում ընդգրկված է 16 հարց։
«Սակայն ինձ թույլ չտվեցին մուտք գործել Ռուսաստանի Դաշնություն՝ պատճառաբանելով, որ իմ մուտքն այնտեղ արգելված է։ Թե ինչ պատճառով՝ հայտնի չէ»,- գրել է պատգամավորը։
Բադալյանն իրավիճակը բնութագրել է որպես «տարօրինակ և մտահոգիչ»՝ նշելով, որ ազգային խորհրդարանական պատվիրակության անդամին թույլ չեն տալիս մեկնել միջազգային խորհրդարանական կազմակերպության կենտրոնակայան՝ պաշտոնական պարտականությունները կատարելու և հանձնաժողովի աշխատանքներին մասնակցելու համար։
Բադալյանը «Քաղաքացիական պայմանագրի» առաջին ներկայացուցիչը չէ, որի ճանապարհը փակել է ռուսական կողմը։ Ռուսական ավիաընկերությունը մարտին չեղարկել էր «Քաղաքացիական պայմանագիր» խմբակցության պատգամավոր Մարիա Ղազարյանի տոմսերը Ռուսաստանի տարածքով տարանցիկ դեպի Աշխաբադ չվերթի համար։ Նա դիվանագիտական անձնագրով մեկնում էր միջխորհրդարանական հանդիպման։ Հայաստանի արտաքին գործերի նախարար Արարատ Միրզոյանն այն ժամանակ հայտարարել էր, որ գերատեսչությունը ռուսական կողմից պարզաբանումներ կպահանջի։ Նրա խոսքով՝ նման դեպքն առաջինը չէր։
Ավելի վաղ լրատվամիջոցները հայտնել էին, որ Ռուսաստան մուտքն արգելել են «Քաղաքացիական պայմանագիր» խմբակցության այն ժամանակվա պատգամավոր Խաչատուր Սուքիասյանին։ 24News-ը 2025 թվականի հունիսին, հղում անելով աղբյուրներին, գրել էր, որ որոշումը պայմանավորված է քաղաքական և տնտեսական պատճառներով։
