Վերաքննիչ դատարանը մերժել է Ռոբերտ Քոչարյանի կալանքի դեմ բերված բողոքը, այս մասին ասուլիսի ժամանակ ասաց փաստաբան Արամ Օրբելյանը:
«Մերժել է նույն հիմնավորումներով, ինչ որ մերժել է բազմաթիվ նմանատիպ բողոքներ, երբ առանց մանրակրկիտ անդրադառնալու հիմքերին` ընդհանուր, ձևական ձևակերպումներ են տրվել»,-ասաց նա։
Արամ Օրբելյանը միաժամանակ հիշեցրեց, որ Ռոբերտ Քոչարյանը կալանավորումից 10-15 օր առաջ բժշկական միջամտության էր ենթարկվել։
«Հիմա մենք որոշակի գործողություններ ենք կատարելու՝ առողջական վիճակը զուտ ստուգելու առումով։ Սա ենթադրում է որոշակի հետազոտություն։
Այնպես չէ, որ նախագահը գանգատ ունի՝ դրանով է պայմանավորված ստուգումը։ Հետվիրահատական ապաքինման ժամանակահատված կա, որը կարևոր է։ Նախագահը վիրահատվել է կալանքից առաջ, հիմա ստուգման կարիք կա»,- ասաց փաստաբանը։
Հիշեցնենք՝ շուրջ 2 ամիս է, ինչ ՀՀ երկրորդ նախագահ Ռոբերտ Քոչարյանը կալանավորված է։