ՀՀ-ն ներկայացնող Չարաևան՝ WTA-ի վարկանիշի լավագույն 100-յակում – armeniatoday.am

Հայաստանը ներկայացնող թենիսիստ Ալինա Չարաևան կարիերայում առաջին անգամ ընդգրկվել է աշխարհի 100 ուժեղագույն թենիսիստների թվում։

Կանանց թենիսային ասոցիացիայի (WTA) հոկտեմբերի 12-ի թարմացված վարկանիշում 24-ամյա մարզուհին 118-րդ տեղից բարձրացել է 98-րդ։ Նա դարձել է մենախաղի վարկանիշի լավագույն 100-յակում ընդգրկված Հայաստանի երկրորդ ներկայացուցիչը՝ Էլինա Ավանեսյանից հետո։

Չարաևան Հայաստանը ներկայացնում է 2026 թվականի հուլիսից՝ հայկական քաղաքացիություն ստանալուց հետո։ Մինչ այդ՝ 2019 թվականից, նա ներկայացնում էր Ռուսաստանը։ Վարկանիշում նրա նախորդ լավագույն արդյունքը օգոստոսին զբաղեցրած 108-րդ տեղն էր։

Վարկանիշում բարձրանալուն Չարաևային օգնել է Պեկինի WTA 1000 մրցաշարում ելույթը։ Երկրորդ շրջանում նա 3:6, 6:4, 6:3 հաշվով հաղթել է Ելենա Ռիբակինային․ սա ղազախստանցի թենիսիստի առաջին հանդիպումն էր աշխարհի առաջին ռակետի կարգավիճակում՝ US Open-ում հաղթելուց հետո։ WTA-ի տվյալներով՝ Չարաևան 1975 թվականից ի վեր ամենացածր վարկանիշ ունեցող թենիսիստն է, որին հաջողվել է առաջին սեթը զիջելուց հետո հաղթել աշխարհի առաջին ռակետին։ Սա նաև նրա առաջին հաղթանակն է լավագույն տասնյակից մրցակցի նկատմամբ։ Չորրորդ շրջանում Չարաևան զիջել է չինուհի Չժեն Ցինվենին՝ 1:6, 6:2, 4:6։

Այս մրցաշրջանում Չարաևան առաջին անգամ դուրս է եկել նաև WTA-ի հիմնական տուրի Համբուրգի և Սան Պաուլոյի մրցաշարերի քառորդ եզրափակիչներ և հաղթել Միդլենդի WTA 125 մրցաշարում։ Թենիսիստը 2020 թվականին դարձել է «Ռոլան Գարոսի» պատանեկան մրցաշարի եզրափակչի մասնակից։

Leave a Comment