Հայաստանի ֆուտբոլի հավաքականի խաղացող Նարեկ Հովհաննիսյանը նորամուտն է նշել լեհական «Լեխիայի» կազմում՝ հոկտեմբերի 12-ին մասնակցելով Ժեշուվի «Ստալի» դեմ Լեհաստանի Առաջին լիգայի 10-րդ տուրի հանդիպմանը։
Ակումբի պաշտոնական կայքից տեղեկանում ենք, որ Հովհաննիսյանը խաղադաշտ է դուրս եկել 71-րդ րոպեին՝ փոխարինման։ Հանդիպումն ավարտվել է «Լեխիայի» հաղթանակով՝ 2։1 հաշվով։
Քսանամյա Հովհաննիսյանը «Լեխիա» է տեղափոխվել երևանյան ԲԿՄԱ-ից՝ սեպտեմբերին։ Նրա պայմանագիրը գործում է մինչև 2031 թվականի հունիսի 30-ը։ 2025/26 մրցաշրջանում ֆուտբոլիստը Հայաստանի առաջնության բարձրագույն խմբում անցկացրել է 26 խաղ և խփել ութ գոլ։ Ազգային հավաքականում նա տեղափոխության պահին անցկացրել էր երկու խաղ, իսկ մինչ այդ պարբերաբար հանդես էր գալիս երիտասարդական հավաքականներում։
«Լեխիան» սեպտեմբերին պայմանավորվել էր նաև «Արարատ-Արմենիայի» ֆուտբոլիստ Արթուր Սերոբյանի տեղափոխության շուրջ։ Մինչև 2027 թվականի հունվարի վերջ նա կշարունակի խաղալ երևանյան ակումբում, իսկ փետրվարի 1-ին կմիանա լեհական թիմին։
