ԱՄՆ նախագահ Դոնալդ Թրամփը հայտարարել է Ռուսաստանի և Ուկրաինայի միջև էներգետիկ հրադադարի հաստատման մասին։
«Ռուսաստանի և Ուկրաինայի միջև պատերազմում այս պահից ուժի մեջ է մտնում էներգետիկ հրադադար։ Երկու կողմերն էլ համաձայնություն են տվել դրան։ Մի՛ խախտեք այն», — գրել է նա Truth Social սոցիալական ցանցում։
Մոսկվան և Կիևը դեռևս չեն հաստատել էներգետիկ օբյեկտների ուղղությամբ հարվածները դադարեցնելու վերաբերյալ պայմանավորվածության ձեռքբերումը։
Ուկրաինայի նախագահ Վոլոդիմիր Զելենսկին Axios-ին հայտնել է, որ Թրամփի հայտարարությունն էներգետիկ հրադադարի մասին իր համար «նորություն էր»։
«Բայց եթե ռուսները համաձայնեն էներգետիկ հրադադարին, Ուկրաինան նույնպես կհամաձայնի։ Եթե նախագահ Թրամփն այդ հարցում պայմանավորվածություն է ձեռք բերել Պուտինի հետ, խնդրում ենք մեզ հայտնել, թե երբ կսկսվի հրադադարը։ Մենք պատրաստ ենք և կընդունենք այն», — Զելենսկու խոսքերը մեջբերում է պարբերականը։
Axios-ը նշում է, որ Թրամփի հայտարարությանը նախորդել էր նրա և Զելենսկու հարաբերություններում լարվածության աճը, որը պայմանավորված էր Ուկրաինայի՝ Ռուսաստանի նավթավերամշակման գործարաններին հասցրած հարվածներով։
Հոկտեմբերի 10-ին Թրամփը հայտարարել էր ռուսական դիզելային վառելիքի արտահանման նկատմամբ պատժամիջոցների մեղմացման մասին համաձայնության ձեռքբերման վերաբերյալ։
Այնուհետև նա կոչ էր արել Ուկրաինային փոխել Զելենսկուն՝ մեղադրելով նրան պատերազմն ավարտելու հնարավորությունները բաց թողնելու մեջ։
Ի պատասխան՝ Ուկրաինայի նախագահը հայտարարել էր, որ Ուկրաինայում ընտրություններ կանցկացվեն, եթե Ռուսաստանը համաձայնի 60-օրյա հրադադարի հաստատմանը։
