Մոսկվայի Տնտեսագիտությանբարձրագույն դպրոցի Համալիր եվրոպական և միջազգային հետազոտությունների կենտրոնի (ՑԿԵՄԻ) առաջատար գիտաշխատող Պրոխոր Տեբինը Alpha News-ի հետ զրույցում անդրադարձել է ռուս-ամերիկյան հարաբերությունների հեռանկարներին, Ռուսաստանի ու Եվրոպայի հարաբերություններում ստեղծված իրավիճակին։ Հարցազրույցը նա տվել է Կենտրոնի 20-ամյակին նվիրված «Ռուսաստանը և նոր բազմաբևեռ աշխարհակարգը․ գաղափարից դեպի իրականություն» միջազգային գիտագործնական համաժողովի շրջանակում։
Խոսելով Մոսկվայի և Վաշինգտոնի միջև հարաբերությունների կարգավորման հնարավորության մասին՝ փորձագետը նշել է, որ բարելավման հույսերը պահպանվում են, սակայն առայժմ չարժե արագ փոփոխություններ ակնկալել։
«Ռուսաստանի և ԱՄՆ-ի միջև հարաբերությունների կարգավորման հույսերն, իհարկե, պահպանվում են։ Ռուսաստանը տրամադրված է կառուցողական փոխգործակցության և պատրաստ է երկխոսության։ Սակայն հարաբերությունները չափազանց ծանր ու բարդ են, և ես խորհուրդ չէի տա չափազանց մեծ հույսեր կապել դրանց հետ։ Շատ բան կախված է նրանից, թե ինչպես կզարգանա իրավիճակը առաջիկա ամիսներին։
Բայց ընդհանուր առմամբ մենք շատ ավելի շատ ոչ բարեկամական քայլեր և ոչ բարեկամական հռետորաբանություն ենք տեսնում։ Ավելին՝ այժմ ԱՄՆ-ը մեծապես զբաղված է Մերձավոր Արևելքում ստեղծված իրավիճակով, որը զարգանում է ոչ այնքան այնպես, ինչպես կցանկանար Վաշինգտոնը, և չի նպաստում Մոսկվայի ու Վաշինգտոնի հարաբերությունների կարգավորմանը։
Բացի այդ, ԱՄՆ-ում այն ուժերը, որոնք տրամադրված են երկարաժամկետ մրցակցության և Ռուսաստանի հետ հարաբերություններում բացասական միտումների պահպանմանը, շարունակում են բավականին ուժեղ մնալ։ Հնարավոր է՝ հետագայում դրանք նույնիսկ ավելի ուժեղանան»,- նշել է Տեբինը։
Մեկնաբանելով Ռուսաստանի և Եվրոպայի հարաբերությունները՝ Մոսկվայի և Վաշինգտոնի միջև երկխոսության մեկնարկի ֆոնին՝ փորձագետը հայտարարել է, որ Ռուսաստանի նկատմամբ Եվրամիության քաղաքականությունը շարունակում է առճակատման բնույթ կրել։
«Իրականում իրավիճակը բավականին բազմաշերտ է։ Մի կողմից՝ բարձր մակարդակով երկխոսության առկայությունը և հենց այդ երկխոսության փաստը, ինչպես նաև առճակատման գաղափարական բաղադրիչի թուլացումը, իհարկե, նպաստում են լարվածության նվազեցմանը։
Միևնույն ժամանակ, Եվրամիության քաղաքականությունը շարունակում է լինել բացահայտ սադրիչ և թշնամական։ ԵՄ-ի համար հակառուսական հռետորաբանությունն ու ռազմականացումն այն ուղղություններից են, որոնք նպաստում են Եվրամիության համախմբմանը։ Տարբեր ներքաղաքական և ներքին տնտեսական պատճառներով միությունը բախվում է կենտրոնախույս միտումների։
Այս ամենը, բնականաբար, միջնաժամկետ հեռանկարում բավականին բացասաբար կանդրադառնա իրավիճակի զարգացման վրա»,- նշել է Տեբինը։