Պանամայում 7,6 մագնիտուդով երկրաշարժից հետո հոկտեմբերի 9-ին երկրի բոլոր ուսումնական հաստատություններում երկրորդ հերթի դասերը կասեցվել են։ Այս մասին հայտարարել է Պանամայի կրթության նախարարությունը։
«Այսօր՝ հոկտեմբերի 9-ին, երկրի բոլոր ուսումնական հաստատություններում երկրորդ հերթի դասերը կասեցվում են», — ասվում է գերատեսչության հայտարարության մեջ։
Նախարարությունը քաղաքացիներին կոչ է արել պահպանել հանգստություն, հետևել միայն պաշտոնական աղբյուրներին և խուսափել չստուգված տեղեկությունների տարածումից։
Ավելի վաղ Եվրոպական-միջերկրածովյան սեյսմոլոգիական կենտրոնը հայտնել էր, որ Պանամայի ափերի մոտ 7,6 մագնիտուդով երկրաշարժ է գրանցվել, որից հետո նույն շրջանում ևս մեկ՝ 6,0 մագնիտուդով ստորգետնյա ցնցում է տեղի ունեցել։