Հոկտեմբերի 8-ին Թեհրանի Իմամ Խոմեյնիի անվան միջազգային օդանավակայանում վայրէջք է կատարել արտասահմանյան ավիաընկերության կողմից շահագործվող առաջին առևտրային ինքնաթիռը՝ փետրվարի 28-ին Իսրայելի և ԱՄՆ-ի հետ զինված հակամարտության սկսվելուց ի վեր, հայտնել է AFP-ն՝ հղում անելով Իրանի պետական հեռուստատեսությանը: Իրաքի Նաջաֆ քաղաքից չվերթը կատարել է Iraqi Airways ընկերությունը։
Ինքնաթիռը Թեհրան է ժամանել տեղական ժամանակով ժամը 6:50-ին (Երևանի ժամանակով ժամը 7:20-ին): Իրանի հեռուստատեսությունը ցուցադրել է ինքնաթիռի վայրէջքի կադրեր և հայտնել, որ թռիչքը երկկողմանի էր։
Iraqi Airways-ը վերսկսել է թռիչքները դեպի Իրան 7-ամսյա ընդմիջումից հետո: Ավիաընկերությունը նախատեսում է ամենօրյա չվերթներ իրականացնել Նաջաֆից դեպի Թեհրան, Մաշհադ և Սպահան: Չվերթները դադարեցվել էին մարտի սկզբին՝ Իրանի դեմ ԱՄՆ-Իսրայելական պատերազմի սկսվելուց հետո։
Չվերթների վերսկսումը հնարավոր էր դարձել այն բանից հետո, երբ ԱՄՆ ֆինանսների նախարարությունը իրաքյան ավիափոխադրողին հատուկ ազատում էր տվել պատժամիջոցներից: Սեպտեմբերի 29-ին թույլտվություն էր տրվել ուղևորափոխադրումները վերականգնելու համար, այդ թվում՝ ուխտավորների, ուսանողների և բժշկական ուղևորների համար։
Բացի այդ, Վաշինգտոնը թույլ էր տվել իրանական ավիաընկերություններին, բացառությամբ Mahan Air-ի, օրական մինչև 40 չվերթ իրականացնել դեպի Նաջաֆ և Նաջաֆից։
Սեպտեմբերին Միացյալ Նահանգները խստացրել էր իրանական ավիացիոն արդյունաբերության նկատմամբ սահմանափակումները, ինչը մի քանի երկրներին ստիպել էր դադարեցնել իրանական ավիափոխադրողների սպասարկումը։ Արդյունքում, իրանական ավիաընկերությունները ստիպված էին չեղարկել որոշ միջազգային չվերթներ։ Թեհրանը բողոք էր ներկայացրել Միջազգային քաղաքացիական ավիացիայի կազմակերպությանը (ICAO):
Հայաստանի և Իրանի միջև չվերթները շարունակվում էին նույնիսկ նախքան օտարերկրյա ավիափոխադրողների կողմից Թեհրան չվերթների վերսկսումը։ Հայաստանը այն քիչ երկրներից էր, որը շարունակում էր կանոնավոր չվերթներ իրականացնել Իրանից՝ չնայած ԱՄՆ պատժամիջոցներին։
Կանոնավոր չվերթներ իրականացնող այլ երկրների թվում էին Ռուսաստանը, Չինաստանը, Բելառուսը և Պակիստանը։
