Ստրասբուրգում գտնվող Եվրոպական խորհրդարանի շենքում ցուցադրվել է ԱՄՆ նախագահ Դոնալդ Թրամփի 2,5 մետր բարձրությամբ ծաղրական արձանը։ Դանիացի նկարիչ Յենս Գալշիոտի ստեղծած «Orange Plague» («Նարնջագույն ժանտախտ») արձանը Թրամփին պատկերում է մերկ վիճակում՝ ոսկեգույն մահակով, փոքրահասակ տղամարդու ուսերին նստած։
Քանդակի կողքին տեղադրված բացատրական գրառումներում Թրամփը ներկայացվում է որպես «Անարդարության արքա», որը նստած է մեկ այլ մարդու մեջքին՝ նրան ծանրության տակ կքած պահելով։ Գալշիոտը արձանը ներկայացրել է նաև որպես կլիմայի փոփոխության դեմ պայքարին խոչընդոտելու վերաբերյալ իր քննադատության խորհրդանիշ։
Արձանը Եվրոպական խորհրդարանում կցուցադրվի մինչև հինգշաբթի։ Այն ցուցադրելու հրավերը կատարել է Դանիայի ձախակողմյան եվրապատգամավոր Պեր Կլաուզենը։ Թրամփը արձանի ցուցադրությանը դեռ չի արձագանքել։
