ԱՄՆ պետքարտուղար Մարկո Ռուբիոն հայտարարել է, որ Հորմուզի նեղուցը ներկայում բաց է, և դրա միջոցով նավթի արտահանումը գրեթե հասել է հակամարտությունից առաջ եղած մակարդակին։ Նրա խոսքով՝ Իրանը կորցրել է նեղուցի նկատմամբ վերահսկողությունը։
Ռուբիոն նաև քննադատել է Իրանի իշխանությունների ծախսային քաղաքականությունը՝ պնդելով, որ նավթային եկամուտները չեն ուղղվում երկրի ենթակառուցվածքների և բնակչության կյանքի բարելավմանը։ Նրա խոսքով՝ այդ միջոցների մի մասը ծախսվում է «Հեզբոլլահի», «Համասի», Իրաքում գործող զինված խմբավորումների և հութիների աջակցման ու սպառազինության վրա։
Միաժամանակ, միջազգային տվյալները ցույց են տալիս, որ նավթի հոսքերը իսկապես զգալիորեն վերականգնվել են, սակայն դեռ ամբողջությամբ չեն վերադարձել նախապատերազմյան մակարդակին։
Reuters-ի տվյալներով՝ սեպտեմբերին Պարսից ծոցի երկրներից նավթի և հարակից վառելիքների արտահանումը կազմել է նախապատերազմյան մակարդակի մոտ 81%-ը։