Հայաստանում ձերբակալվել է քաղաքական ակտիվիստ Արթուր Դանիելյանը։ Այս մասին սոցցանցերում հայտնել է փաստաբան Տիգրան Աթանեսյանը։
Մինչ այդ Դանիելյանը սոցիալական ցանցում գրել էր, որ իրեն հրավիրել են Քննչական կոմիտե։
«Վարույթ է նախաձեռնվել, մեղադրանք է առաջադրվել։ Չգիտեմ՝ ինչի մասին է խոսքը, բայց դա էական էլ չէ։ Եթե քննիչի մոտից դուրս գամ, ուղիղ եթերով կանդրադառնամ այս ամենին», – գրել էր Դանիելյանը։
Դրանից հետո հայտնվեց փաստաբանի հաղորդագրությունը նրա ձերբակալության մասին։
Ավելի ուշ Աթանեսյանը տեղեկացրեց, որ Դանիելյանին կտեղափոխեն դատարան՝ խափանման միջոց ընտրելու համար (քննությունը միջնորդում է կալանավորել նրան)։ Նրան մեղադրում են սոցցանցում արված գրառման համար՝ խուլիգանության հատկանիշներով։ Թե կոնկրետ որ գրառման մասին է խոսքը, փաստաբանը չի հայտնել։
Դատելով վերջին հրապարակումներից՝ Դանիելյանը հանդես էր գալիս իշխանությունների հասցեին խիստ քննադատությամբ։