Գերմանիայի ոստիկանությունը լրտեսության և պետական դավաճանության փորձի կասկածանքով ձերբակալել է երկրի արտաքին հետախուզության նախկին ղեկավար Ավգուստ Հաննինգին և նրա աշխատակազմի նախկին ղեկավար Մանֆրեդ Դ.-ին:
Դատախազության տվյալներով՝ Մանֆրեդ Դ.-ն Հաննինգին է տրամադրել գաղտնի տեղեկատվություն, որը վերջինս այնուհետև օգտագործել է որպես խորհրդատու իր աշխատանքում, այդ թվում՝ օտարերկրյա հետախուզությունների աշխատակիցների համար:
Թե որ երկրների մասին է խոսքը, և արդյոք Հաննինգը տեղեկություններ է տրամադրել Ռուսաստանին, անհայտ է:
80-ամյա Հաննինգը ձերբակալվել է Հյուսիսային Հանգստյան Վեստֆալիայում, իսկ 64-ամյա Մանֆրեդ Դ.-ն՝ Բավարիայում: Զուգահեռաբար խուզարկություններ են անցկացվել նրանց տնային հասցեներում, ինչպես նաև Բեռլինում:
Ավգուստ Հաննինգը Գերմանիայի Դաշնային հետախուզական ծառայությունը (BND) գլխավորել է 1998-ից 2005 թվականներին, իսկ 2005-ի դեկտեմբերից մինչև 2009-ի նոյեմբեր եղել է Ներքին գործերի նախարարության պետքարտուղարներից մեկը: Մանֆրեդ Դ.-ն այդ ամբողջ ընթացքում եղել է Հաննինգի աշխատակազմի ղեկավարը:
Ինչպես ենթադրում է դատախազությունը, 2010 թվականի գարնանը Հաննինգը խնդրել է Դ.-ին իրեն տրամադրել հետախուզական տվյալներ, որոնց վերջինս հասանելիություն ուներ որպես BND-ի աշխատակից: Հետախուզության նախկին ղեկավարը մտադիր էր դրանք օգտագործել իր մասնավոր խորհրդատվական գործունեության մեջ՝ հարստանալու նպատակով:
Մինչև 2022 թվականի հունիսը Դ.-ն Հաննինգին է փոխանցել մոտ 2 հազար փաստաթուղթ, որոնցից շատերը գաղտնագրված էին և նախատեսված էին բացառապես BND-ի ներքին օգտագործման համար:
Դեպքերից մեկում Հաննինգն օգտագործել է Մանֆրեդ Դ.-ից ստացված գաղտնի տեղեկությունները օտարերկրյա պետության հատուկ ծառայության աշխատակցի պատվերով վերլուծական նյութ պատրաստելու համար, պնդում է դատախազությունը: Թե որ պետության մասին է խոսքը, գերատեսչությունը չի հստակեցնում:
Spiegel-ի տվյալներով՝ քննիչներն ուսումնասիրում են Հաննինգի հնարավոր կապը Ադրբեջանի հետ․ հաղորդվում էր, որ նա կապեր էր պահպանում այդ երկրից մի գործակալի հետ: Դաշնային դատախազությունը հրաժարվել է մեկնաբանել այս տեղեկությունը, Բաքուն նույնպես դեռևս չի արձագանքել դրան: