Ադրբեջանի և Հայաստանի միջև խաղաղությունը նպաստում է տարածաշրջանի տնտեսական զարգացմանը։
Այս մասին Բաքվում անցկացվող Գերմանիա-Ադրբեջան փոխկապակցվածության հարցերով համաժողովի ժամանակ հայտարարել է Գերմանիայի Դաշնային էկոնոմիկայի և էներգետիկայի նախարարության գլխավոր տնօրենի տեղակալ Գերլինդ Հեքմանը։
«Տասնամյակներ շարունակ հակամարտությունը ձևավորել է տարածաշրջանի քաղաքական և տնտեսական իրողությունները, իսկ այժմ այդ պատկերն սկսում է փոխվել։ Սա իսկապես շատ լավ է», — նշել է նա։
Հեքմանը նաև հայտնել է, որ Գերմանիայի կանցլեր Ֆրիդրիխ Մերցը երկու երկրների միջև ձեռք բերված պայմանավորվածությունները գնահատել է որպես իսկապես պատմական քայլ։
«Նա ընդգծել է, որ Հարավային Կովկասում կայուն խաղաղությունը բխում է ոչ միայն տարածաշրջանի, այլև, անշուշտ, Եվրոպայի և Գերմանիայի շահերից։ Դա հնարավորություն կտա ստեղծել նոր տրանսպորտային կապեր, բացել նոր շուկաներ և ներդրողներին հնարավորություն կտա երկարաժամկետ ծրագրեր մշակել», — ասել է նախարարության ներկայացուցիչը։