Եմենի կառավարությունը հայտարարել է հութիների վերահսկողության տակ գտնվող տարածքները վերադարձնելու նպատակով լայնածավալ ռազմական գործողություն սկսելու մասին։
Եմենի կառավարական ուժերը սկսել են «ռազմավարական» հարձակում մայրաքաղաք Սանայի ուղղությամբ, որը հութիների վերահսկողության տակ է գտնվում 2014 թվականից։
Նույն օրը Սաուդյան Արաբիայի աջակցությունը ստացող Եմենի ուժերը հայտարարել են, որ վերահսկողություն են հաստատել երկրի արևմտյան ափին գտնվող Դհուբաբ շրջանում՝ Բաբ էլ-Մանդեբի նեղուցի մոտ։ Հութիները, սակայն, հերքել են այդ տեղեկությունը։
Եմենում մարտերը վերջին շաբաթներին կրկին սրվել են։ Հուլիսին փլուզվել է 2022 թվականին հաստատված փխրուն հրադադարը, ինչի հետևանքով ավելի քան 100 հազար մարդ ստիպված է եղել լքել իր բնակավայրը։
Անցած ամիս հութիները լայնածավալ առաջխաղացում են իրականացրել և իրենց վերահսկողության տակ են վերցրել Կարմիր ծովի մոտ 150 կմ երկարությամբ առափնյա հատված և Բաբ էլ-Մանդեբի նեղուցի հարակից տարածքներ։ Նեղուցը Կարմիր ծովը կապում է Ադենի ծոցի հետ և միջազգային ծովային առևտրի կարևորագույն ուղիներից է։
Եմենի արտգործնախարարը միջազգային հանրությանը կոչ է արել լրացուցիչ աջակցություն ցուցաբերել հութիների դեմ պայքարում՝ ընդգծելով, որ երկրի կայունությունը «բխում է ամբողջ աշխարհի շահերից»։