Իսպանիայի ավելի քան 50 քաղաքներում զանգվածային բողոքի ակցիաներ են անցկացվել բնակարանների վարձակալության բարձր գների և բնակարանների պակասի դեմ։ Մադրիդում իշխանությունների տվյալներով՝ փողոց է դուրս եկել շուրջ 70 հազար մարդ, մինչդեռ ակցիաների կազմակերպիչները մասնակիցների թիվը գնահատել են 500 հազարի սահմաններում։
Ցուցարարները պահանջում են զգալիորեն նվազեցնել վարձակալության գները, սահմանել անժամկետ վարձակալության պայմանագրեր և որոշ դեպքերում բնակարաններ վերցնել ներդրողներից։ Բողոքի ակցիաների գլխավոր կարգախոսներից մեկը «Դեպի համազգային գործադուլն» է։ Մադրիդի Վարձակալների միությունից հայտնել են, որ գործադուլը կարող է սկսվել առաջիկայում, սակայն դրա հստակ ամսաթիվը դեռ հայտնի չէ։
Բողոքի նոր ալիքի պատճառներից մեկը 87-ամյա Մարիա դել Կարմեն Աբասկալի վտարումն է։ Նա իր բնակարանում ապրել է ավելի քան 70 տարի։ Տունը ներդրումային հիմնադրամի կողմից ձեռք բերելուց հետո վարձավճարը նախատեսվում էր բարձրացնել ամսական 500-ից մինչև 2650 եվրո, այնուհետև այն սահմանվել է 1650 եվրո՝ մոտ 300 եվրոյով ավելի, քան կնոջ կենսաթոշակը։ Սեպտեմբերի 23-ին նրան վտարել էին բնակարանից, սակայն բողոքի ակցիաներից հետո թույլատրել են վերադառնալ։
Ցուցարարները պահանջում են նաև վերանայել կառավարության բնակարանային քաղաքականությունը։ Քննարկված առաջարկների թվում են վարձավճարների աճի սահմանափակումը, վարձակալության պայմանագրերի երկարաձգումը և ներդրումային հիմնադրամների գործունեության նկատմամբ սահմանափակումները։ Սակայն այդ նախաձեռնություններին ընդդիմադիր կուսակցությունների մեծ մասը դեմ է քվեարկել։
Իրավիճակը լարվել է նաև Վալենսիայում, որտեղ բողոքի ակցիան վերածվել է ոստիկանության հետ բախումների։ Ցուցարարները ճեղքել են անշարժ գույքի ոլորտի համաժողովի տարածքը շրջափակող արգելապատնեշները։ Ոստիկանությունը կիրառել է ռետինե փամփուշտներ և արցունքաբեր գազ։ Տուժածների վերաբերյալ տեղեկություններ դեռ չեն հաղորդվել։