«Ուժեղ Հայաստան» խմբակցության ղեկավար Նարեկ Կարապետյանը եվրոպական հանրությանը կոչ է արել արձագանքել Շաքի գյուղում ադրբեջանցի զինծառայողի հետ կապված միջադեպին և հանդես է եկել առանց արդարադատության երաշխիքների նրա արտահանձնման դեմ։ Այս մասին նա հայտարարել է հոկտեմբերի 2-ին՝ ԵԽԽՎ-ում ելույթ ունենալիս։
«Վտանգավոր շրջապտույտը պետք է դադարի։ Եվրոպական հանրությունը չի կարող մնալ պարզապես դիտորդ։ Բռնություն գործադրողները երբեք չպետք է հերոսացվեն։
Հայաստանի խաղաղ բնակիչների կյանքն առաջնային նշանակություն ունի։ Ոչ՝ արտահանձնմանը, եթե արդարադատությունը երաշխավորված չէ։ Այո՝ միջազգային արդարադատությանը»,- հայտարարել է Կարապետյանը։
Ելույթում նա պատմել է հոկտեմբերի 1-ին Սյունիքի մարզի Շաքի գյուղում տեղի ունեցած միջադեպի մասին։ Կարապետյանի խոսքով՝ զինված ադրբեջանցի զինծառայողը հատել է Հայաստանի սահմանը, ներխուժել տուն և կրակել կնոջ վրա նրա երեք երեխաների ներկայությամբ։
Պատգամավորը տեղի ունեցածը կապել է, իր բնորոշմամբ, նախորդ նմանատիպ դեպքերի համար պատժի բացակայության հետ։
Որպես օրինակ Կարապետյանը բերել է ադրբեջանցի սպա Ռամիլ Սաֆարովի դեպքը, որը 2004 թվականին Բուդապեշտում՝ ՆԱՏՕ-ի «Գործընկերություն հանուն խաղաղության» ծրագրի ընթացքում, կացնով սպանել էր քնած հայ սպա Գուրգեն Մարգարյանին։
Ադրբեջանին՝ 2012 թվականին արտահանձնվելուց հետո Սաֆարովը ներում էր ստացել նախագահ Իլհամ Ալիևից, ստացել էր պաշտոնի բարձրացում, բնակարան և դրամական վճարումներ։
«Ադրբեջանցի զինծառայողները ներթափանցում են Հայաստան, հարձակվում խաղաղ քաղաքացիների վրա, իսկ երբ նրանց արտահանձնում են Ադրբեջանին, այնտեղ նրանց ընդունում են որպես հերոսների»,- ասել է Կարապետյանը։
ՀՀ գլխավոր դատախազության տվյալներով՝ ադրբեջանցի զինծառայող Նասիմի Մուսաևին իրավապահները ձերբակալել են Շաքիում՝ նույն փողոցի մեկ այլ տանը։
Հայաստանում քրեական վարույթն ընթանում է հինգ հոդվածով՝ զենքի գործադրմամբ առողջությանը ծանր վնաս պատճառելու, հրազենի ապօրինի շրջանառության, բնակարան ապօրինի մուտք գործելու, պետական սահմանն ապօրինի հատելու և հրազենի մաքսանենգության հատկանիշներով։ Այս հոդվածներից ամենածանրը նախատեսում է մինչև 10 տարվա ազատազրկում։
Դատախազության տվյալներով՝ Մուսաևն ապօրինի հատել է Հայաստանի պետական սահմանը և հոկտեմբերի 1-ին կրակել տեղի բնակչուհու վրա։
Շաքիում Armenia Today-ի աղբյուրները հայտնել են, որ միջադեպը տեղի է ունեցել երեխաների ներկայությամբ։ Վիրավոր կնոջը նախ տեղափոխել են Սիսիանի բժշկական կենտրոն, ապա՝ Երևան։ Դատախազության տվյալներով՝ բուժօգնության կարիք են ունեցել նաև նրա երկու երեխաները։
