Լրագրող Թաթուլ Հակոբյանի ֆեյսբուքյան գրառումը. «Հայերն ու ադրբեջանցիները նոր չէ, որ միմյանց ներկայությունը և պետություն ունենալու իրավունքը դնում են կասկածի տակ:
«Կոկա կոլան ավելի հին է, քան Ադրբեջանը» և կամ «Հայաստանը հիմնադրել են ռուսները՝ ադրբեջանական հողի վրա» և նմանօրինակ պատումները դրանց դրսևորումներից են:
Իրականում, երբ ուսումնասիրում ենք 1804-1813 և 1826-1826 թվականների ռուս-պարսկական պատերազմներն ու դրանից հետո Արաքսի ձախափնյակի քաղաքական գործընթացները, մասնավորապես՝ վարչական բաժանումները, տեսնում ենք բազմաթիվ նմանություններ, թե ինչի հիմքի վրա են ձևավորվել ժամանակակից Հայաստանն ու Ադրբեջանը:
Երբ խոսք է բացվում հայերի ու ադրբեջանցիների՝ ոչ կառավարական ներկայացուցիչների հանդիպումների անհրաժեշտության մասին, մտածում եմ, որ այստեղ խոսելու շատ բան ունեն պատմաբանները, ազգագրագետները և քաղաքական աշխարհագրության մասնագետները:
Մենք և ադրբեջանցիները սովորաբար սևեռվում ենք այնպիսի կետերի վրա, որոնց մեզ բաժանում են և երբեմն մեր կողք կողքի ապրելը դարձնում անհամատեղելիության աստիճանի անհնարին:
Մինչդեռ կան բազմաթիվ կետեր, որոնք ունեն նմանություններ և արժե դրանց վրա ուշադրություն դարձնել:
Որպես անհատ ուսումնասիրող, որ կաշկանդված չէ տաբու և ցավոտ թեմաների բարձրաձայնումով, կառաջարկեի ուշադրություն դարձնել ազգակերտման այն նախնական գործընթացներով, որոնք սկիզբ են առել այն ժամանակներից, երբ Ռոմանովների Ռուսաստանը Պարսկաստանից գրավեց Անդրկովկասը»: