Կառավարությունը 2027 թվականին նախատեսում է ՀՀ պաշտպանության նախարարության (ՊՆ) ծախսերը 563 միլիարդից հասցնել 616,5 միլիարդ դրամի ($1,71 մլրդ), հետևում է հոկտեմբերի 1-ին հավանության արժանացած պետական բյուջեի նախագծից։ ՀՀ 2026 թվականի պետական բյուջեի նկատմամբ ծախսերի ավելացումը կկազմի 53,4 միլիարդ դրամ ($147,9 մլն)՝ մոտ 9,5%։
ՊՆ կողմից 2027 թվականին ծախսերը նախատեսվում է իրականացնել հինգ ծրագրի շրջանակներում։ Ընդհանուր գումարից ընթացիկ ծախսերի գծով նախատեսված է 276,4 միլիարդ դրամ ($765,7 մլն)՝ 44,8%, իսկ ոչ ֆինանսական ակտիվների գծով՝ 340,1 միլիարդ դրամ ($942 մլն)՝ 55,2%։
Միջոցների հիմնական մասը՝ 613,8 միլիարդ դրամ ($1,7 մլրդ), նախատեսված է «ՀՀ պաշտպանության ապահովում» ծրագրով։ Սա ՀՀ 2026 թվականի պետական բյուջեից 53,7 միլիարդ դրամով ($148,8 մլն) ավելի է։
Ծրագրի շրջանակներում նախատեսվում են ՀՀ զինված ուժերի պահպանման, ռազմական, մարտական տեխնիկայի, տրանսպորտային միջոցների, կապի համակարգի սարքավորումների, զորանոցային և տեխնիկական գույքի, պարենի, հանդերձանքի, վառելիքաքսուքային նյութերի սահմանված պաշարների մակարդակի, զենքի և զինամթերքի հնարավոր ներհանրապետական գնումների, բանակի մարտունակության և կենսաապահովման պահանջների բավարարման ծախսերը։
Եվս 1,065 միլիարդ դրամ ($2,95 մլն) նախատեսված է «Ռազմաբժշկական սպասարկում և առողջապահական ծառայություններ» ծրագրի գծով։ Ծրագրի շրջանակներում իրականացվելու են վերականգնողական մասնագիտացված բուժօգնության գծով ծառայությունների տրամադրում, համաճարակային միջոցառումների կազմակերպում, զինվորական հոսպիտալների և բժշկական կետերի սարքավորումների ընթացիկ վերանորոգման և տեխնիկական սպասարկման ծառայություններ։
«Միջազգային ռազմական համագործակցություն» ծրագրով նախատեսված է 974,6 միլիոն դրամ ($2,7 մլն)։ Միջոցները կուղղվեն, մասնավորապես, ռազմական անվտանգության համակողմանի ապահովմանը, զինված ուժերի արդիականացման գործում միջազգային փորձի և օժանդակության կիրառմանը, կադրերի ուսուցմանն ու վերապատրաստմանը, սպառազինությամբ և ռազմական տեխնիկայով ապահովման պահանջների բավարարմանը։
«Ռազմական ուսուցում և վերապատրաստում» ծրագրի շրջանակներում նախատեսված է 352,8 միլիոն դրամ ($977 հազար)։ Ծրագրով ՀՀ զինված ուժերի զինծառայողների ռազմական ուսուցումը կազմակերպվում է ՌԴ և այլ օտարերկրյա պետությունների ռազմաուսումնական հաստատություններում՝ բակալավրի և ակադեմիական կրթական ծրագրերով, ինչպես նաև մինչև վեց ամիս տևողությամբ կարճաժամկետ դասընթացների ծրագրով։
«Հումանիտար ականազերծման և փորձագիտական ծառայություններ» ծրագրի գծով նախատեսված է 306,7 միլիոն դրամ ($850 հազար)։
ՀՀ 2027 թվականի պետական բյուջեի ընդհանուր ծախսերը նախատեսված են 4,072 տրիլիոն դրամի ($11,28 մլրդ) չափով։ Այսպիսով, ՊՆ ծախսերը կկազմեն բյուջետային բոլոր ծախսերի մոտ 15,1%-ը։
Իշխանությունները 2026 թվականին, հակառակը, ՊՆ ծախսերը կրճատել էին մոտ 15%-ով՝ 2025 թվականի 664,6 միլիարդ դրամից հասցնելով 563 միլիարդ դրամի։ Այսպիսով, 2027 թվականի համար նախատեսված աճը մասամբ կփոխհատուցի նախորդ կրճատումը, սակայն ծախսերը կմնան 2025 թվականի մակարդակից ցածր՝ 616,5 միլիարդ դրամ՝ 664,6 միլիարդի դիմաց։
Վարչապետ Նիկոլ Փաշինյանը 2025 թվականի օգոստոսին հայտարարել էր, որ իշխանությունները 2026 թվականի բյուջեում ռազմական ծախսերի էական ավելացում չեն նախատեսում և որոշումները կճշգրտեն՝ կախված իրավիճակի զարգացումից։
Համեմատության համար՝ Ադրբեջանը 2027 թվականին նախատեսում է պաշտպանության և ազգային անվտանգության ծախսերն ավելացնել 1,1%-ով՝ հասցնելով 8,816 միլիարդ մանաթի ($5,19 մլրդ), հայտնում են ադրբեջանական ԶԼՄ-ները։
2026 թվականին այդ նպատակներով նախատեսված է 8,717 միլիարդ մանաթ (մոտ $5,13 մլրդ)։
Ռազմական և ազգային անվտանգության ծախսերը կկազմեն Ադրբեջանի պետական բյուջեի բոլոր ծախսերի մոտ 21%-ը։
