Վարչապետ Նիկոլ Փաշինյանը լրագրողներին հայտարարել է, որ Հայաստանում պետք է օրենքով կարգավորել կրոնական կազմակերպությունների գործունեության ընդհանուր դաշտը։ Այս մասին Փաշինյանը հայտարարել է լրագրողներին ճեպազրույցի ժամանակ, որի ուղիղ հեռարձակումն իրականացրել է Armenia Today-ի YouTube ալիքը։
Միաժամանակ նա ընդգծել է, որ պետության հետ առանձնահատուկ հարաբերությունները Սահմանադրությամբ ամրագրված են ոչ բոլոր կրոնական կազմակերպությունների համար։
«Կրոնական կազմակերպությունների ընդհանուր դաշտը պետք է կարգավորվի, իհարկե, պետք է կարգավորվի։ Բայց առանձնահատկությունն այն է, որ ոչ բոլոր կրոնական կազմակերպությունների և պետության առանձնահատուկ հարաբերություններն են Սահմանադրության մեջ արձանագրված»,- ասել է Փաշինյանը։
Գործող Սահմանադրության 18-րդ հոդվածը ճանաչում է Հայաստանյայց Առաքելական Սուրբ Եկեղեցու՝ որպես ազգային եկեղեցու բացառիկ առաքելությունը։ Վարչապետի հայտարարությունը հնչել է նոր Սահմանադրության մշակման և կաթողիկոսին փոխելու իշխանությունների պահանջների ֆոնին։
Կաթողիկոսի հեռացումն ու եկեղեցու «բարենորոգումը» ներառված են կառավարության 2026-2031 թվականների ծրագրում, իսկ նոր Սահմանադրության տեքստը, Փաշինյանի խոսքով, կհրապարակվի առաջիկա ամիսներին։
Վարչապետի խոսքով՝ քահանաները պետք է ֆիքսված աշխատավարձ ստանան և օգտվեն սոցիալական երաշխիքներից, իսկ եկեղեցական համայնքը պետք է իմանա, թե որքան գումար է մուտք գործում եկեղեցի և ինչի վրա է ծախսվում։
«Աշխատավարձ չստացող քահանա պետք է չլինի Հայաստանի Հանրապետությունում»,- հայտարարել է Փաշինյանը։
Վարչապետը կրկին պնդել է, որ Ամենայն հայոց կաթողիկոս Գարեգին Բ-ն պետք է հեռանա, և պետությունն այդ նպատակով կօգտագործի բոլոր լծակները։
«Ուրիշ տարբերակ չկա, պետք է հեռանա։ Եվ պետությունը բոլոր լծակները օգտագործելու է դրա համար»,- ասել է նա։
Մայր Աթոռը նախկինում կառավարության գործողությունները որակել էր եկեղեցու ներքին կյանքին միջամտություն և կոչ արել դադարեցնել եկեղեցու նկատմամբ հալածանքները։
