Բաքվի նախաձեռնող խումբը ՄԱԿ-ի հատուկ զեկուցողներին կոչ է արել աջակցել ադրբեջանցիների վերաբնակեցմանը Հայաստանում՝ դա անվանելով այսպես կոչված «Արևմտյան Ադրբեջանի» անձանց «վերադարձ», հայտնում են ադրբեջանական լրատվամիջոցները։
Այդ մասին ասված է համատեղ դիմումում, որն ընդունել են սեպտեմբերի 28-ին Նյու Յորքում՝ ՄԱԿ-ի կենտրոնակայանում անցկացված «Վերադարձի իրավունք և ապագաղութացում» համաժողովի մասնակիցները։
Միջոցառումն անցկացվել է ՄԱԿ-ի Գլխավոր վեհաժողովի 81-րդ նստաշրջանի բարձր մակարդակի շաբաթվա ընթացքում։
Դիմումի մեջ կոչ է արվում նաև ապահովել Հայաստանում «ադրբեջանական մշակութային, կրոնական և պատմական ժառանգության պաշտպանությունը»։
Բացման ելույթում Բաքվի նախաձեռնող խմբի ներկայացուցիչն անդրադարձել է, իր ձևակերպմամբ, «արևմտյան ադրբեջանցիների» վերադարձի իրավունքին՝ պնդելով, թե հարցը պետք է քննարկվի ՄԱԿ-ի համապատասխան կառույցների և միջազգային մեխանիզմների շրջանակում։
Համաժողովի ընթացքում ցուցադրվել է նաև կարճ վավերագրական ֆիլմ, որը, ըստ կազմակերպիչների, պատմում է ներկայիս Հայաստանի տարածքում ապրած ադրբեջանցիների պատմության և նրանց տեղահանության մասին։
Նույն դիմումում «Արևմտյան Ադրբեջանը» նշված է Բոնեյրի, Արուբայի և Սինտ Մարտենի, ինչպես նաև սիկհական, կոնգոյական, բուրունդիական և ռուանդական համայնքների հետ մեկ շարքում։
Բաքվի նախաձեռնող խումբը ստեղծվել է 2023 թվականին Բաքվում։ Այն կազմակերպում է ապագաղութացման և «վերադարձի իրավունքի» թեմաներով միջոցառումներ, այդ թվում՝ ՄԱԿ-ի կենտրոնակայանում։ Հունիսին խումբը նմանատիպ համաժողով էր անցկացրել Վաշինգտոնում՝ ԱՄՆ Կոնգրեսի շենքում։
Վարչապետ Նիկոլ Փաշինյանը սեպտեմբերի 17-ին Ադրբեջանում շրջանառվող «Արևմտյան Ադրբեջան» խոսույթն անվանել էր լրջագույն մարտահրավեր և անվտանգային սպառնալիք Հայաստանի, ինչպես նաև հաստատված խաղաղության համար։
«Ուժեղ Հայաստան» կուսակցությունն ավելի վաղ զգուշացրել էր, որ Բաքուն համակարգված առաջ է մղում այսպես կոչված «Արևմտյան Ադրբեջանի» թեզը։ «Ուժեղ Հայաստան» խմբակցության ղեկավար Նարեկ Կարապետյանը մայիսին Armenia Today-ի հարցին ի պատասխան հայտարարել էր, որ Ադրբեջանում գործում է «Արևմտյան Ադրբեջանի Երևանի թատրոնը», որը ֆինանսավորում է երկրի Մշակույթի նախարարությունը։ Նրա խոսքով՝ այդ թատրոնը հավակնում է Երևանում Արցախի ներկայացուցչության շենքին, իսկ Ադրբեջանը ձգտում է մշակութային հիմնավորումներ ստեղծել Հայաստանում իր հավակնությունների համար։
Մայիսին ՀՀ վարչական դատարանը Գլխավոր դատախազության հայցով անվավեր էր ճանաչել ներկայացուցչության շենքի նկատմամբ Արցախի կառավարության սեփականության իրավունքի գրանցումը։
