ՀՀ ներքին գործերի նախարարությունն առաջարկել է մինչև 12 տարեկան երեխաների փոխադրման կանոնների խախտման համար տուգանքը 5000 դրամից բարձրացնել մինչև 10 000 դրամ։ Բացի այդ, առաջարկվել է կիրառել մեկ տուգանային միավոր։
Ներկայում մինչև 12 տարեկան երեխաների փոխադրման կանոնների խախտման համար նախատեսված է 5000 դրամ տուգանք։ ՆԳՆ-ի նախագծով առաջարկվել է այն կրկնապատկել՝ հասցնելով 10 000 դրամի, և կիրառել մեկ տուգանային միավոր։
Պատասխանատվության խստացման անհրաժեշտությունը ՆԳՆ-ն բացատրել է երեխաներին առանց մանկական պահող սարքերի փոխադրելու դեպքերի մեծ թվով։ 2025 թվականին ոստիկանությունն արձանագրել է երեխաների փոխադրման կանոնների խախտման 11 198 դեպք՝ 5747-ով ավելի, քան մեկ տարի առաջ։
Նախագծի հիմնավորման մեջ ներկայացված տվյալներով՝ 2025 թվականին մինչև 12 տարեկան երեխաների մասնակցությամբ գրանցվել է 404 ճանապարհատրանսպորտային պատահար, որոնց հետևանքով 11 երեխա զոհվել է, 487-ը՝ վիրավորվել։ 2024 թվականի համեմատ նման ՃՏՊ-ների թիվն աճել է 82-ով, տուժածների թիվը՝ 116-ով, իսկ զոհերի թիվը չի փոխվել։
Նախագծով նախատեսվել են նաև այլ փոփոխություններ։ «Մուտքն արգելվում է» և «Բեռնատար ավտոմոբիլների երթևեկությունն արգելվում է» ճանապարհային նշանների պահանջները խախտելու համար առաջարկվել է սահմանել 10 000 դրամ տուգանք և կիրառել երկու տուգանային միավոր։
Տրանսպորտային միջոցը երթևեկելի մասի երկրորդ կամ ավելի շարքում կայանելու համար առաջարկվել է սահմանել 10 000 դրամ տուգանք և մեկ տուգանային միավոր։ Կանգառի և կայանման որոշ այլ կանոնների խախտումների համար նախատեսված 5000 դրամ տուգանքն առաջարկվում է բարձրացնել մինչև 10 000 դրամ և կիրառել մեկ տուգանային միավոր։
Մասնավորապես, խոսքը հասարակական տրանսպորտի կանգառի գոտում կանգառի կամ կայանման, ինչպես նաև տրանսպորտային միջոցը երթևեկելի մասի եզրին ոչ զուգահեռ կայանելու մասին է։ ՆԳՆ-ն այս պատժամիջոցների խստացումը բացատրել է խցանումները կանխելու և տրանսպորտային հոսքի բնականոն երթևեկությունն ապահովելու անհրաժեշտությամբ։
Տուգանային միավորների համակարգը Հայաստանում կիրառվել է ճանապարհային երթևեկության որոշ խախտումների համար՝ դրամական տուգանքի հետ միասին։ Խախտումների համար միավորները հանվում են վարորդին հատկացված սահմանաչափից, իսկ սահմանաչափի սպառումը կարող է հանգեցնել տրանսպորտային միջոց վարելու իրավունքի կասեցման։
ՆԳՆ-ից հայտնել են, որ փոփոխությունների փաթեթի ընդունումը պետական բյուջեի եկամուտների կամ ծախսերի ավելացում կամ նվազում չի նախատեսում։ Նախագծի համաձայն՝ օրենքն ընդունվելու դեպքում փոփոխություններն ուժի մեջ կմտնեն պաշտոնական հրապարակմանը հաջորդող տասներորդ օրը։
