Հայաստանում հունիսի 7-ին կայացած խորհրդարանական ընտրությունների վերաբերյալ զեկույցը կլինի Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի առաջին օրվա գլխավոր թեմաներից մեկը, նշված է նստաշրջանի օրակարգում։
Նստաշրջանը կմեկնարկի սեպտեմբերի 28-ին Ստրասբուրգում։ Նույն օրը վեհաժողովը կընտրի Հայաստանից ԵԽԽՎ փոխնախագահ։ Հայաստանի ընտրությունների վերաբերյալ զեկույցը կներկայացնի շվեյցարացի խորհրդարանական Դամիեն Կոտիեն, ով գլխավորում էր քվեարկության դիտարկման ԵԽԽՎ հատուկ առաքելությունը։ Փաստաթուղթը հրապարակվել է սեպտեմբերի 22-ին։
ԵԽԽՎ աշնանային նստաշրջանը կտևի մինչև հոկտեմբերի 2-ը։ Օրակարգում են նաև Պորտուգալիայի նախագահ Անտոնիու Ժոզե Մարտինշ Սեգուրուի և Գերմանիայի արտգործնախարար Յոհան Վադեֆուլի ելույթները, ինչպես նաև քննարկումներ Ռուսաստանի վերաբերյալ Մարդու իրավունքների եվրոպական դատարանի որոշումների կատարման, Միջազգային քրեական դատարանին սպառնացող վտանգների և մամուլի ազատության մասին։
Մայիսին ԵԽԽՎ պատվիրակությունը Հայաստան կատարած նախընտրական այցի արդյունքներով կոչ էր արել ապահովել հավասար պայմաններ ընտրությունների մասնակիցների համար և քվեարկությունն անցկացնել առանց ընտրողների վրա ճնշման և վարչական ռեսուրսի չարաշահման։ Ընտրությունների արդյունքներով «Քաղաքացիական պայմանագիրը» ստացել է ձայների 49,7456%-ը, «Ուժեղ Հայաստան» դաշինքը՝ 23,2710%-ը, «Հայաստան» դաշինքը՝ 9,9231%-ը։
