Ղազախստանի նախագահ Կասիմ-Ժոմարտ Տոկաևը սեպտեմբերի 27-ին պաշտոնանկ է արել երկրի պաշտպանության նախարար Դաուրեն Կոսանովին։ Որոշումը կայացվել է Մանգիստաուի շրջանում տեղի ունեցած ողբերգական միջադեպից երեք օր անց, որի հետևանքով 14 զինծառայող է մահացել։
Միջադեպը տեղի է ունեցել սեպտեմբերի 24-ին՝ Կասպից ծովի ափին անցկացվող Ղազախստանի ռազմածովային զորավարժությունների ընթացքում։ Պաշտպանության նախարարության տվյալներով՝ եղանակային պայմանների կտրուկ վատթարացման և քամու ուժգնացման հետևանքով 17 զինծառայողներ հայտնվել են ջրում և քշվել ծով։
Նրանցից երեքին հաջողվել է փրկել, իսկ 14 զինծառայող մահացել է։ Զոհերը 19-23 տարեկան էին։
Տոկաևը սեպտեմբերի 25-ը հայտարարել էր ազգային սգո օր։ Նա նաև հանձնարարել էր ստեղծել հատուկ հանձնաժողով՝ Պաշտպանության նախարարությունում իրավիճակի համապարփակ ուսումնասիրություն իրականացնելու և միջադեպի հանգամանքները պարզելու համար։
Քրեական գործեր են հարուցվել
Միջադեպի առնչությամբ քրեական գործեր են հարուցվել ծանր հետևանքների հանգեցրած անփութության և նավագնացության կանոնների խախտման հոդվածներով։
Քննությունն իրականացնում է միջգերատեսչական քննչական խումբը։ Գործընթացը համակարգում է կառավարության հանձնաժողովը՝ փոխվարչապետ Կանատ Բոզումբաևի գլխավորությամբ։
Քննության շրջանակում արդեն ձերբակալվել է Ղազախստանի զինված ուժերի ավագ և բարձրագույն հրամանատարական կազմի հինգ պաշտոնյա։
Ղազախստանի ՆԳ նախարարության տվյալներով՝ ձերբակալվածների թվում են Ռազմածովային ուժերի շտաբի պետն ու գլխավոր հրամանատարի առաջին տեղակալը, երկու զորամասերի հրամանատարները, ծովային վաշտի հրամանատարը և նավակի հրամանատարը։
Հետաքննությունը պետք է պարզի զինծառայողների մահվանը հանգեցրած հանգամանքները, այդ թվում՝ զորավարժությունների կազմակերպման, անվտանգության կանոնների պահպանման և հրամանատարական կազմի գործողությունների հետ կապված հարցերը։