Անկարայում իրավապահ մարմինները ձերբակալել են մի տղամարդու, ով արհեստական բանականության (ԱԲ) միջոցով ստեղծել և սոցիալական ցանցերում տարածել էր Թուրքիայի նախագահ Ռեջեփ Թայիփ Էրդողանի և արդարադատության նախարար Աքըն Գյուրլեքի մասնակցությամբ լուսանկարներ, հայտնում են թուրքական լրատվամիջոցները։
«Պարզվել է, որ կասկածյալն իր WhatsApp*-ի կարգավիճակի բաժնում (status) հրապարակել է նախագահ Ռեջեփ Թայիփ Էրդողանի և արդարադատության նախարար Աքըն Գյուրլեքի, ինչպես նաև՝ իր սեփական լուսանկարները. ենթադրվում է, որ այդ պատկերները ստեղծվել են արհեստական բանականության կիրառմամբ», – հայտնել են Անկարայի դատախազությունից, որն իրականացնում է հետաքննությունը։
Քննիչները ենթադրում են, որ ձերբակալվածը կարող էր օգտագործել այս մեթոդը՝ ստեղծելու տպավորություն, թե ինքը կապեր ունի բարձրաստիճան պաշտոնյաների հետ։
Հաղորդվում է, որ ձերբակալվածն ավելի վաղ դատվածություն է ունեցել քրեական օրենսգրքի տարբեր հոդվածներով։
