ԱՄՆ-ն կընդլայնի իր ռազմական ներկայությունը Գրենլանդիայում՝ այնտեղ հիմնելով ևս երկու «շատ մեծ» ռազմական բազա, հայտարարել է ԱՄՆ նախագահ Դոնալդ Թրամփը ՄԱԿ-ի Գլխավոր ասամբլեայում ունեցած իր ելույթի ժամանակ։
Նախկինում նույն տեղեկատվությունը հաղորդել էր Reuters-ը՝ հղում անելով երեք աղբյուրների։ Սեպտեմբերի 22-ին, Նյու Յորքում ՄԱԿ-ի Գլխավոր ասամբլեայի նիստի շրջանակներում, նախատեսվում է ստորագրել համաձայնագիր ԱՄՆ-ի, Գրենլանդիայի և Դանիայի միջև՝ մեկ ամերիկյան բազա վերաբացման և նորը Դանիայի ինքնավար շրջանում հիմնելու վերաբերյալ, նշվում է հաղորդագրության մեջ։
Հրապարակման պահին Սպիտակ տունը հրաժարվել է մանրամասն մեկնաբանություն տալ այս հարցի վերաբերյալ, սակայն հաստատել է նախկինում շրջանառվող տեղեկատվությունը «Գրենլանդիայի և Միացյալ Նահանգների անվտանգությունն ապահովելու և պաշտպանելու» համար համաձայնագիր կնքելու ծրագրերի մասին։ Դանիայի և Գրենլանդիայի կառավարությունները դեռևս որևէ հայտարարություն չեն արել այս հարցի վերաբերյալ։
Ըստ Reuters-ի՝ նախատեսվում է վերաբացել ամերիկյան Bluie West One ավիաբազան Գրենլանդիայի հարավում գտնվող Նարսարսուակ բնակավայրում։ Ռոյթերսը հաղորդում է, որ բազան փակվել է 1950-ականներին:
Երկրորդ վայրը, որտեղ ամերիկյան ռազմական ներկայությունը կընդլայնվի, կարող է լինել արևելյան ափին գտնվող Մեստերսվիգի ռազմական հենակետը, որն այժմ օգտագործվում է դանիական «Սիրիուս» հատուկ նշանակության ուժերի կողմից։